د پاکستان په لاهور ښار کې د نرښځې (ټرانسجنډر) زده کوونکو لپاره د پخلي په یوه ځانګړي پروګرام کې ګډون، نه یوازې د پخلي مهارت زده کول دي، بلکې هغوی ته د نوي ژوند او ښه راتلونکي هیله هم ورکوي.
نها ملک، چې مخکې یې په ودونو او محفلونو کې نڅا کوله، د جنورۍ میاشتې راهیسې د پاکستان د "پخلي او هوټلدارۍ په انسټیټیوټ کې د نرښځیانو ټولنې لپاره په یوه ځانګړي روزنیز پروګرام کې ګډون کړی دی.
دا شپږ میاشتنی وړیا پروګرام، چې د پاکستان په لاهور ښار کې پیل شوی، په جنورۍ میاشت کې ۲۵ نرښځیانو په کې نوم لیکنه کړې او د فبرورۍ له لومړۍ نېټې څخه بله ۲۵ کسیزه ډله هم ددې پروګرام له لارې روزنه پیل کړې ده.
۳۱ کلنه نها ملک له اوس څخه د دوبۍ په هوټلونو کې د سراشپز په توګه د کار کولو هیلې په سر کې لري.
هغه وايي: "زه هیڅکله غیرحاضري نه کوم او دومره له زده کړې سره مصروفه یم، چې نور د نڅا لپاره وخت نه لرم. "
په پاکستان کې د نرښځیانو ټولنې پر وړاندې ژور ټولنیز تعصب شتون لري. له هغه ځایه چې پدغه هېواد کې ډېرې نرښځیان د خپلو بنسټیزو حقوقو څخه بې برخي دي، نو دوی مجبوره دي چې د سوالګرۍ، نڅا یا د نورو غیرقانوني لارو له لارې خپل د ژوندانه اړتیاوي پوره کړي. د دې تر څنګ، هغوی تل د تاوتریخوالي او بریدونو له وېرې سره ژوند کوي.
د ملګرو ملتونو پراختیایي ادارې د تېر کال د رپوټ پر بنسټ، په پاکستان ګڼ شمېر نرښځیانو د تاوتریخوالي یا ناوړه چال چلند سره مخامخ شوي دي. رپوټ د نرښځیانو د ټولنې په حواله لیکلی، چې نرښځیان د خپلې هویت له امله د کار موندلو فرصتونه له لاسه ورکړي دي.ددې ادارې د معلوماتو له مخې، یوازې ۷ سلنه نرښځیان په رسمي ادارو کې کار کوي.
خو سره له دې، په وروستیو کلونو کې، د پاکستان د نرښځیانو ټولنې یو شمېر غړو د حکومت او رسنیو له لارې د خپلو حقونو لپاره غږ پورته کړی، چې دا هڅې د عامه پوهاوي د زیاتوالي لامل شوې او مثبت بدلونونه یې راوستي دي.
پدې لړ کې د پاکستان سترې محکمې د دوی لپاره د دریم جندر پېژندلو حق ورکړی او ټینګار یې کړی چې دوی باید د هېواد د نورو وګړو په څېر مساوي حقونه ولري.
همدارنګه د ۲۰۲۳ کال په وروستیو کې، په لاهور ښار کې د نرښځیانو لپاره په ګډه له نورو مسافرو سره په ګاډو کې د تګ راتګ ځانګړې خدمات پیل شول، ترڅو لدې لارې هغوی له تبعیض او ځورونې څخه خوندي وساتي.
همداراز، په ۲۰۲۲ کال کې، د پاکستان حکومت د نرښځیانو ټولنې لپاره د مرستې یو ځانګړی ټیلیفوني کرښه هم فعاله کړې ده.
نها ملک وایي: "په ټولنه معمولا موږ ته په سترګه کتل کیږي، خو موږ باید دا لیدلوری بدل کړو. اوس، چې خلک ما د سراشپز په ځانګړي جامه کې ویني، راځي او پوښتنه کوي چې څه کار کوم. "
د نوموړي په خبره، زده کوونکي په خوشحالۍ سره انسټیټیوټ ته راځي، خپل رنګین کالي د سپین یونیفورم سره بدلوي او د پخلي هنر زده کوي.
خو دا یو اسانه سفر نه دی. دوی هره میاشت ۸۰۰۰ پاکستانۍ روپۍ د مرستې په توګه ترلاسه کوي، چې د زده کوونکو لپاره بسنه نه کوي.
۲۶ کلنه زویا خان وایي: "کله چې زما د کور کرایه ۱۵۰۰۰ روپۍ وي، نو زه به څنګه له دغو لږو پیسو سر ژوند وکړم؟" هغه زیاتوي، چې د کور د کرایې ترڅنګ د بریښنا او اوبو بیلونه هم ور سره زیات کړي. نو لدې امله مجبوره یوو، چې لا هم د میاشتې څو ځله په مراسمو کې نڅا وکړو.
نوموړې وویل: "دا ريښتیا دي چې مخکې مې د نڅا له لارې ښه عاید درلود، خو په هغه کار کې په درنه سترګه راته نه کتل کیدل. "
زویا خان چې غواړي له فراغت وروسته د سړک غاړې کې یو کوچنی کافې شاپ پرانیزي، وویل: "موږ ولې دې ځای ته راځو؟ ځکه موږ دلته هیله او امید وینو."
د دې پروګرام اجرائیوي مشره، نادیا شهزاد وایي چې دا پروژه د نرښځیانو ټولنې، چې یو شاته پاتې او له پامه غورځول شوی قشر دی، په ټولنه کې د یوځای کېدو لپاره مهم ګام دی.
هغې وویل، چې دغه انسټیټیوټ هڅه کوي د فارغ شویو زده کوونکو لپاره په بهر کې د کار فرصتونو لپاره د ویزې اسانتیاو په موخه د دولتي چارواکو ملاتړ ترلاسه کړي. د دې ترڅنګ، د ځینو هوټلونو او رستورانتونو سره خبرې روانې دي، چې ددې پروګرام د فارغانو لپاره د میاشتني تر ۳۰زرو پاکستاني روپیو پورې دندې برابرې کړي.
خو د نرښځیانو ټولنې مشره، شبنم چوهدري، وایي چې د نڅا او سوالګري پرېښودل او د پخلي زده کړې ته مخه کول، د دې ټولنې لپاره اسانه نه دي.
ډېری خلک لا هم شک لري، چې ایا ټولنه به دوی ته د کار زمینه برابره کړي؟ یا ایا مشتریان ددوی په لاس پاخه شوي خواړه وخوري؟
هغې وویل: "ما مخکې داسې ډېر نرښځې زده کوونکې لیدلي، چې د سینګار او خیاطۍ زده کړو ته تللي وې، خو وروسته یې کار نه دی موندلی او بېرته مجبور شوي، چې د سوالګري او نڅا ته مخه وکړي."
هغې زیاته کړه، پداسې حال کې چې په پاکستان لا هم سلګونو زرو ځوانان چې لوړې زده کړو او مهارتونو لري، د بیکارۍ څخه کړیږي، نرښځیانو ته د مناسب کار د موندلو په اړه شک لري.
چوهدري پوښتنه کوي: "په داسې سخت رقابتي چاپېریال کې او یو داسې محیط کې چې څوک حاضر نه دی موږ ته لاس راکړي، نرښځیانو ته به څوک کار ورکړي؟"
فورم \ دبحث خونه