په امریکا کې د مقدماتي یا ګوندي انتخاباتو په لړ کې، ټیډکروز د کنساس او مېن په ایالتونو کې تر خپلو سیالانو مخکې شوی دی.
د جمهوري غوښتونکو مخکښ کاندید ډونالډ ټرمپ بیا د د کنټکي په ایالت کې انتخابات وګټل.
جمهوري غوښتونکو په لوزیانا او پورتریکو کې هم مقدماتي انتخابات کړي دي.
د کنساس په ایالت کې سناتور ټیډ کروز ۵۰ فیصده رایې وګټلي. د هغه نه وروسته میلیاردر ډونالډ ټرمپ دوهم راغلی دی او د هغه نه وروسته بیا مارکو روبیو او جان کېسیک دي.
د کنساس ایالت به د جمهوري غوښتونکو ګوندي غونډې ته چې کاندید به وټاکي ۴۰ استازي استوي.
دیموکراتانو هم د شنبې په ورځ په مقدماتي انتخاباتو کې د خپل کاندید د ټاکلو لپاره په کنساس، نبراسکا او لوزیانا کې انتخابات وکړل.
مقدماتي نتایج، چې د رسنیو د سرویګانو په اساس، اعلان شوي ښيي چې د نبراسکا او کنساس په انتخاباتو کې برني سنډرس مخکې دی او په لوزیانا کې بیا هیلري کلنټن مخکې ده.
تر اوسه پورې د جمهوري غوښتونکو ترمنځ ډونالډ ټرمپ ډیر استازي لري.
د شنبې د ورځې د انتخاب شوو استازو نه بغیر، د ټرمپ د استازو شمیر ۳۲۹ دی او د ټیډ کروز استازي ۲۳۱ دي.
د شنبې د ورځې په انتخاباتو کې جمهوري غوښتونکي ۱۵۵ استازي ټاکي.
د شنبې د ورځې د ټاکل شوو استازو نه بغیر، تر اوسه په دیموکراتانو کې هیلري کلنټن ۱۰۶۶ او برني سنډرس ۴۳۲ استازي لري.
په ټولو ایالتونو کې د مقدماتي انتخاباتو وروسته به د دواړو ګوندونو د کاندیدانو د ټاکلو لپاره استازي غونډه وکړي.
د ګوند په غونډو کې به د نومبر د میاشتې د انتخاباتو لپاره د ګوندونو کاندیدان وټاکل شي.