د لاس رسي وړ اتصالات

جمهور رئیس غني د یکشنبې په ورځ امریکا ته ځي


ټاکل شوې چې جمهوررئیس غني سره به په دې سفر کې د بهرنیو چارو د وزارت سرپرست صلاح الدین رباني هم ملګرتیا وکړي

د افغانستان د بهرنیو چارو وزارت وايي چې ټاکل شوې ده چې جمهور رئیس محمد اشرف غني به په نیو یارک کې د ملګرو ملتونو په عمومي اسمبله کې د ګډون په موخه د یکشنبې په ورځ د یو لوړپوړې پلاوي په مشرۍ امریکا ته لاړ شي.

جمهور رئیس غني په لومړي ځل د افغانستان د جمهور رئیس په توګه د ملګرو ملتونو د عمومي اسمبلۍ په غونډو کې ګډون کوي.

د افغانستان د بهرنیو چارو وزارت د جمعې په ورځ په یوه اعلامیه کې ویلي چې جمهور رئیس غني سره به په دې سفر کې د بهرنیو چارو د وزارت سرپرست صلاح الدین رباني هم ملګری وي.

د دغې اعلامیې له مخې جمهور رئیس غني به د ملګرو ملتونو عمومي اسمبلۍ ته د وینا ترڅنګ د یو شمیر هیوادونو د مشرانو او بهرنیو چارو له وزیرانو سره هم لیده کاته وکړي.

د ملګرو ملتونو عمومي اسمبلۍ غونډې د سپټامبر په نولسمه ورځ پیلیږي.

د ملګرو ملتونو د عمومي اسمبلۍ راروانه غونډه د دغې ټولنې ۷۲ مه غونډه ده، چې سږکال د پوهنې، چاپیریال ساتنې، ټولنیز پرمختګ پر سر د بحثونو ترڅنګ سولې ته د خلکو د لیوالتیا او ټولو خلکو ته د یو شان ښه ژوند شرایطو د برابرولو تر عنوان لاندې غونډې کوي.

تراوسه لا ملګروملتونو عمومي اسمبلۍ ته د جمهوررئیس غني د وینا محتویات په ډاګه شوي نه دي.

د افغانستان د چارو یو شمیر کارپوهان وايي چې د ملګروملتونو په عمومي اسمبلۍ کې د جمهور رئیس غني ګډون د دې لپاره هم مهم دی، چې امریکا تازه افغانستان او جنوبي اسیا لپاره خپله نوې ستراتیژي اعلان کړې ده.

د کابل پوهنتون د سیاسي علومو استاد محمد موسی فریور امر یکا غږ ته وویل چې جمهور رئیس غني به هڅه وګړي چې د ملګروملتونو د تربیون له لارې خپل غږ په اوچت ډول نړیوالو ته ورسوي اوهم به افغانستان او سیمې ته د تروریزم له اړخه په ورپيښو ګواښونو به وغږیږي.

د کابل پوهنتون یو بل استاد پوهاند ودیر ساپی په دې باور دي چې په نړیوالو غونډو کې د افغانستان په ستونزو باندې بحث او خبرې په نړیواله کچه د دغه هیواد ستونزې مطرح کوي، نو ځکه ښاغلی ساپی، په دی غونډه کې د جمهور رئیس غني ګډون بې ګټې نه ګڼي.

ښاغلي ساپي وویل " د افغانستان جمهور رئیس ګډون ضرور دی، ځکه چې افغانستان کې لا هم په جګړه روانه ده، امنیت په کې نه دی ټینګ شوی، د ده سفر دومره اهمیت لري چې په افغانستان او سیمه کې د سولې او امنیت د ټینګیدو په برخه کې د خپلو هلوځلو په اړه څرګندونې وکړي او که چیرې مشکلات لري هغه مطرح کړي او د اقتصادي مرستو لپاره د ملګروملتونو پاملرنه راجلب کړي ترڅو خلک د فقر له کرښې وژغورل شي".

تراوسه لا څرګنده نه ده چې جمهور رئیس غني به ملګروملتونو ته په کومه ورځ وینا وکړي.

XS
SM
MD
LG