د پاکستان د عمومي انتخاباتو د نتایجو د اعلان نه یوه هفته وروسته د عمران خان د تحریک انصاف او د نوازشریف د مسلم لیگ نون گوندونه ادعا کوي چې د پنجاب په صوبې کې یې اکثریت څوکۍ گټلي دي او حکومت به جوړوي.
د پاکستان د پنجاب صوبه چې د پاکستان د ترټولو لویه صوبه ده، د تیرې لسیزې نه پکې د پاکستان د مسلم لیگ نون گوند حکومت کوي.
د تحریک انصاف گوند کوښښونه گړندي کړیدي چې په مرکز او پنجاب کې د حکومت جوړولو لپاره ازاد کاندیدان د ځان سره یو ځاې کړي. عمران خان دغه مسولیت د گوند یو شتمن غړي جهانگیر ترین ته سپارلی دی.
د تحربک انصاف یو مشر اعجاز چوهدري امریکاغږ ته وویل چې د هغوي گوند به نه یواځې په مرکز بلکه د پنجاب په صوبې کې هم حکومت جوړوي.
د جماعت اسلامي مشر سراج الق تور لگولی دی چې نوي حکومت د راتگ نه مخکې د کاندیدانو په پېسو اخیستلو پیل کړیدی. هغه د امریکاغږ اردو څانگې ته په یوې ځانگړې مرکې کې وویل چې د حکومت چوړولو لپاره د پخوا پشان د غلطو طریقو او لاروچارو نه کار اخیستل کیږي.
ښاغلي حق تور ولگاوه چې د انتخاباتو نه مخکې درغلي شروع شوي وه او د یوې خاص سیاسي گوند د کامیابۍ لپاره هر ډول کوښښونه شویدي.
د پاکستان مسلم لیگ نون گوند دا وخت په پنجاب کې ١٢٩ څوکۍ ترلاسه کړیدي او د ټولو مخکې ده. د تحریک انصاف گوند ١٢٣ څوکۍ ترلاسه کړي خو وایي چې ازاد کاندیدان ورسره یوځاې شویدي او ډیر ژر به یې اعلان وکړي.