د پاکستان د کراچۍ په ښار کې د ترهګرۍ ضد یوې محکمې د پښتون ژغورنې د غورځنګ د مشر منظور پښتین او د دغه غورځنګ د بل مشر او پاکستان د پارلمان د غړي محسن داوړ د نیولو حکم کړی دی.
دغه محکمې د جمعې په ورځ فبروري ۱۹ (کب۱) دا حکم ورکړی دی.
د پي ټي ام په دغو دواړو مشرانو تور دی چې د ۲۰۲۰د ډسمبر په میاشت کې یې په کراچۍ کې په یوې غونډې کې د پاکستان د حکومت، پوځ، پولیسو او نورو ادارو په ضد «ناوړه څرګندونې» کړي دي.
د کراچۍ د سهراب کوټ له غونډې وروسته د پي ټي ام په ځینو مشرانو عریضې وشوې. په دغه ترڅ کې پولیسو د تیر کال ډسمبر په ۱۶په پېښور کې د پي ټي ام یو مشر علي وزیر ونیوه او بیا یې کراچۍ ته انتقال کړ.
علي وزیر د پاکستان د پارلمان غړی هم دی.
د پښتون ژغورنې غورځنګ وکیل قادر خان امریکا غږ ډیوې څانګې ته ویلي دي چې د کراچۍ په ښار کې د «ترهګرۍ ضد دولسمې محکمې چې په زندان کې دننه ده، د منظور پښتین او محسن داوړ د ګرفتارۍ» حکم هم صادر کړی دی.
هغه وویل چې نن د علي وزیر د قضیې د اورېدو ورځ وه او د پي ټي ام هغه غړي چې په ضمانت خوشي شوي وو، هم محاکمې ته راغلي وو. وايي د دوی قضیه به د مارچ په نهم تاریخ بیا اورېدل کیږي.
د پښتون ژغورنې غورځنګ له څو کلونو راهېسې په پاکستان کې د پښتنو د حقونو او ازادۍ لپاره مبارزه کوي.
دغه غورځنګ د پاکستان پوځ او «ریاستي ادارې» له پښتنو سره په بد چلند تورنوي. خو د پاکستان پوځ او حکومت د پي ټي ام دا تورونه رد کړيدي.
