د امریکا د متحدو ایالتونو د بهرنیو چارو وزیر مارکو روبیو وايي، د امریکا ولسمشر ډونالډ ټرمپ د سوریې له موقت ولسمشر سره په مستقیم ډول خبرې کړې دي چې د حکومتي ځواکونو او د کرد ملیشو ډلې ترمنځ وروستۍ نښته چې په سوریه کې د داعش د ترهګرو یو زندان ساتي، کمه کړي.
روبیو د یکشنبې په ورځ په براتیسلاوا کې د سلواکیا له صدراعظم رابرټ فیکو سره په یوه خبري کنفرانس کې وویل چې ټرمپ "په شخصي توګه، یو ځل نه، بلکې دوه ځله، د سوریې د موقت ولسمشر [احمد] الشرع سره خبرې کړې دي."
روبیو وویل چې ټرمپ الشرع ته وویل چې "جګړه ودروي ترڅو موږ هلته د داعش بندیان انتقال کړو.".
روبیو وویل چې الشرع موافقه وکړه او "د داعش زندان څخه د قاتلانو د ډله ییزې تیښتې مخنیوي" کې یې مرسته وکړه.
د داعش د بندیانو یوه ډله د جنوري په ۲۰مه د سوریې په شمال ختیځ کې د حسَکه ولایت له یوه زندان څخه وتښتېده، کله چې د الشرع ځواکونو د کردانو په مشرۍ د سوریې د دیموکراتیکو ځواکونو (SDF) د ملېشو سره چې د دې زندان ساتنه یې کوله، نښته وکړه. حکومتي ځواکونو له پیښې وروسته اکثره بندیان بیرته ونیول، چې د نورو د تېښتې په اړه یې اندیښنې راپورته کړې.
د امریکا پوځ د جمعې په ورځ اعلان وکړ چې له سوریې څخه عراق ته یې د داعش ۵۷۰۰ ترهګرو لیږد بشپړ کړی دی ترڅو د دوی خوندي توقیف ډاډمن شي. د پوځ مرکزي قوماندانۍ په یوه بیان کې وویل چې د انتقال ۲۳ ورځنی ماموریت چې د جنورۍ په ۲۱مه نیټه پیل شوی و پای ته ورساوه.
روبیو د شنبې په ورځ د میونیخ په امنیتي کنفرانس کې د سوریې د بهرنیو چارو وزیر اسد الشیباني او د سوریې د دیموکراتیکو ځواکونو قوماندان مظلوم عبدي سره ولیدل.
د بهرنیو چارو وزارت په یوه بیان کې ویلي چې روبیو د یوې باثباته سوریې لپاره د متحدو ایالتونو د ملاتړ، د ګاونډیانو سره د سولې په ملاتړ او د ټولو قومي او مذهبي لږکیو ډلو د حقونو په ساتلو ټینګار وکړ.
د سوریې حکومت او د کرد اقلیت مشرانو تیره میاشت یوې موافقې ته ورسیدل چې د سوریې دیموکراتیک ځواکونه، چې د داعش پر وړاندې په جګړه کې د امریکا یو مهم متحد دی، د سوریې په پوځ کې مدغم کړي.
د سوریې حکومت د سوریې د دیموکراتیکو ځواکونو د ادغام په بدل کې، د کردانو مدني، کلتوري او تعلیمي حقونه، او همدارنګه په هیواد کې د دوی سیاسي ګډون په رسمیت وپیژندل.
روبیو د یکشنبې په ورځ په خپلو څرګندونو کې، د سوریې د حکومت او د سوریې د دیموکراتیکو ځواکونو ترمنځ د شویو تړونونو د پلي کولو پر اهمیت ټینګار وکړ. هغه وویل چې دمشق باید د سوریې د دروز، بدوین او علویانو په شمول د نورو قومي ډلو سره ورته تړونونه وکړي.
روبیو وویل چې متحده ایالتونه په دې باور دي چې سوریه "په مثبت لوري روانه ده." روبیو زیاته کړه: "سختې ورځې وې. په رښتیا سره، داسې ورځې وې چې له اندېښنو ډکې وې، خو موږ هغه لار خوښوو چې پر روان یو... اوس مهمه خبره پلي کول دي او موږ به په دې کې ډېر ښکېل شو."
د سوریې د دیموکراتیکو ځواکونو قوماندان، عبدي، د ایکس په ټولنیزې رسنۍ په یوه پوسټ کې، په میونخ کې د روبیو سره د جمعې د ورځې د غونډې په اړه تبصره کړې، او ویلي دي چې هغه د الشرع حکومت سره د موافقې په اسانتیا کې د متحدو ایالتونو رول ستایي.
فورم \ دبحث خونه