روسیې او اوکراین د جمعې په ورځ مۍ ۲۳ (جوزا درېیمه) په خپلو کې د جنګي بندیانو لویه تبادله پیل کړه، دوی په ترکیې کې د سولې په مخامخ خبرو کې د بندیانو په تبادلې توافق کړی و.
ولسمشر ټرمپ په خپلې ټولنیزې شبکې سوشل ټروت کې لیکلي دي: «د روسیې او اوکراین ترمنځ د بندیانو یوه لویه تبادله وشوه. ژر به عملي شي. دواړو خواو ته د دغو مذاکراتو له کبله مبارکي وایم. دا به یو ستر څه ته لار پرانیزي؟؟؟»
د اوکراین یو لوړ پوړي مقام تائید کړی چې تبادله روانه ده. د روسیې رسنیو خبر ورکړی دی چې تبادله به په راتلونکو ورځو کې دوام ومومي.
تېره اونۍ روسيې او اوکراین په دریو کلونو کې په لومړي ځل د سولې مخامخ خبرې وکړي. د دواړو خواو ترمنځ د جګړې ختمولو په اړه کوم پرمختګ نه دی شوی، خو موافقه یې وکړه چې هر لوری به ۱۰۰۰ بندیان تبادله کوي.
روسیې د ۲۰۲۲ کال د فبرورۍ په میاشت کې په اوکراین یرغل وکړ.
ولسمشر ټرمپ تېره دوشنبه د روسیې او اوکراین له ولسمشرانو سره له جلا جلا تیلیفوني خبرو څخه وروسته وویل چې دواړه خواو موافقه وکړه چې د اوربند په اړه به خبرې ژر پیل کړي.
خو دا خبرې لا پیل شوي نه دي او نه یې هم د پيل لپاره کومه نېټه مشخصه شوې ده.
فورم \ دبحث خونه