د متحده عربي امارتو ستورمزلی سلطان النیادي د درې نورو ستورمزلو سره د پنجشنبې په ورځ مارچ دوهمه (کب ۱۱) نړیوال فضایي سټیشن ته ولاړ.
د سپیس اکس فضايي شرکت وایي چې د فالکن-۹ راکټ، چې ددې ستورمزلیو فضايي بیړۍ لیږدوي، د امریکا په فلوریډا ایالت کې له کینیډي فضايي مرکز څخه وتوغول شو.
۴۱ کلن النيادي د عربي نړۍ لومړنی ستورمزلی دی چې په اوږدمهاله فضايي ماموریت کې برخه اخلي. ټاکل شوې چې نوموړی به په نړیوال فضايي سټیشن کې شپږ میاشتې تیرې کړي.
تر ده مخکې د اماراتو ستورمزلی هزاع المنصوري په نړیوال سټیشن کې د اته ورځني ماموریت دپاره په ۲۰۱۹ کال کې فضا ته تللی وو.
ټاکل شوې چې د سعودي عربستان لمړنۍ ښځېنه ستورمزلې ریانا برناوي د سعودي د بل ستورمزلي علي القرني سره یو ځای د ۲۰۲۳ کال په وروستیو میاشتو کې په نړیوال فضایي سټیشن کې ماموریت ترسره کړي.
د فالکن-۹ راکټ د شپې د دوولسو بجو لږ وروسته د کینیډي له فضايي مرکز څخه وتوغول شو. ویډیوګانې ښیي چې د توغولو سره سم د شپې آسمان پداسې حال کې روښانه شي چې فالکن نومی راکټ د ختیځ لوري ته په خوځېدو شي.
د متحده عربي اماراتو شاوخوا ۸۰ تنه لیدونکي د ستورمزلي سلطان النیادي لیدو ته ورغلي وو.
د افغانستان ستورمزلی عبدالاحد مومند هم په ۱۹۸۸ کال کې فضا ته تللی وو او په نړیوال فضايي سټیشن کې یې نهه ورځې تیرې کړې وې.