د لاس رسي وړ اتصالات

دویچه وله: طالبان د خبریالانو موندلو لپاره کور په کور تالاشي کوي 


د جرمني اژانس وايي طالبانو یې د یو همکار د کورنۍ غړی وژلی

د جرمني خبري اژانس دویچه وله وايي طالبانو د هغوی د یو همکار کور پلټلی، د کورنۍ یو غړی یې وژلی او یو بل یې ژوبل کړی دی.‌

د دویچه وله مسول مدیر پیتر لمبورګ د پنجشنبې په ورځ اګست ۱۹ (زمري۲۸) ناوخته وویل: «د طالبانو له لوري زموږ د یو ایډټر د خپلوان وژل له تصور ورپورته خواشینوونکی دی او دا د هغه جدي وضعیت ښکارندوی دی چې ټول کارکوونکي او کورنۍ یې په کې ژوند کوي.»

دویچه وله وايي طالبان د دغه خبریال، چې اوس په جرمني کې کار کوي، د خپلوانو د نیولو او موندلو لپاره کور په کور ګرځي.

وايي د دغه خبریال د کورنۍ اکثریت غړي یا تښتېدلي او یا د تېښتې په حال کې دي.‌ دویچه وله وايي طالبانو د دوی د دریو نورو همکارانو کورونه هم پلټلي دي.

ښاغلي لمبورګ په دې برخه کې د جرمني له حکومت څخه د مرستې غوښتنه کړې ده. هغه همدغه راز وویل: «طالبان اوس په کابل او نورو ولایتونو کې کور په کور په خبریالانو پسې ګرځي. وخت زموږ له لاسه وتلی دی.»

د خبریالانو د ژغورنې کمېټې ویلي دي چې طالبانو د کابل له نیول کېدو وروسته د څلورو خبریالانو او د رسنیو د کارکوونکو کورونه پلټي دي.

دغې کمېټې، چې مرکز یې په نیویارک دی، په طالبانو غږ کړی دی چې ژر تر ژره دې د خبریالانو د کورونو پلټل بند کړي او هغوی ته دې اجازه ورکړل شي چې ازادانه خپل کارونه وکړي.

د سه شنبې په ورځ د طالبانو یو ویاند ذبیح الله مجاهد وویل چې هغوی د رسنیو استقلال او ازادۍ ته ژمن دي. ‌په همدې حال کې راپورونه وايي چې طالبانو په کابل او جلال اباد کې هم یو شمېر خبریالان وهلي او ډبولي دي.

XS
SM
MD
LG