په تاجیکستان کې چارواکو د چهار شنبې په ورځ فبروري ۱۵ (سلواغې ۲۶) وویل چې په یاد هیواد کې د واورې د ښوویدو له امله ۱۰ کسان مړه شوي دي.
تاجیکستان د پخواني شوروي اتحاد یو غریب هیواد دی چې تل د ځمکې د ښوویدو او زلزلو په شان طبیعي پيښو څخه زیان ویني.
بیړنیو حالاتو ته د یاد هیواد د رسیدګۍ ادارې چارواکي وایي چې د بدخشان د ګورنو په سیمه کې د واورې د ښوویدو له امله نهه کسان مړه شوي دي.
ګورنو چې د بدخشان د تاجیکستان نیمه خپلواکه سیمه ده او له افغانستان سره په ګډه پوله پرته ده، د پامیر په لوړو غرونو کلابنده شوې ده.
چارواکو ویلي دي چې یو بل کس د تاجیکستان پلازمینې دوشنبې ته نږدې د برف کوچ له امله ژوند له لاسه ورکړی دی.
د تاجیکستان ولسمشر امام علي رحمان د قربانیانو کورنیو سره خواخوږي څرګنده کړې ده.
له دې مخکې چارواکو ویلي وو چې د واورې ښویدو اته کسان د ګورنو بدخشان سیمې د خاروغ ښار په مرکز او دوه نور کسان دوشنبې ته نږدې په یوې لویه لار کې وژل شوي دي.
بیړنیو حالاتو ته د تاجیکستان د رسیدګۍ اداره وایي چې برف کوچونو په خاروغ ښار کې څو ودانۍ هم ویجاړې کړي دي.
د تاجیکستان په ۹۳ سلنه خاوره کې غرونه دي او دا کار ددې لامل شوی چې د ځمکې او واورو ښوویدل هر کال په لس ګونه کسان ووژني.
