د خیبر پښتونخوا په نوښار ولسوالۍ کې د اکتوبر پر څلورمه (تله ۱۳) یو بل کس د ډېنګي تبې له امله ساه ورکړې چې له دې سره په روان ۲۰۲۴ کال کې په دغه ايالت کې له ډېنګي تبې د مړو شويو کسانو شمېر دریوتنو ته رسېدلی دی.
د نوښار د قاضي حسېن احمد مېډیکل کمپلېکس روغتون ویاند میا کستیر شاه رسنيو ته ويلي چې د پورې نوښار ۲۴ کلن ځوان فیضان د اکتوبر په درېیمه هلته په مرګوني حالت کې ور وړل شوی وو چې بیا وروسته يې د همدې رنځ له امله ساه ورکړه. نوموړي زياته کړې چې په هغه روغتون کې په سپټمبر مياشت کې يوه ښځه او يو سړی هم د ډېنګي تبې له امله مړه شوي ول.
د خيبر پښتونخوا د روغتيا چاواکو لا د ډېنګي له امله د مړو شويو کسانو په اړه څه نه دې ويلي، خو د روغتیا ادارې د شمېرو ترمخه د اکتوبر تر درېیمې پورې په دې ایالت کې د ډېنګي د مثبتو پېښو شمېر ۱۲۲۲ ته رسېدلی دی چې پکې له ۷۰۰ زیات کسان بېرته رغېدلي هم دي.
روغتیاپالان وايي، ډېنګي ناروغي د "ايډيس" په نامه د غوماشو د چيچلو له امله پيدا کېږي. دا غوماشې په ولاړو او رڼو اوبو کې هګۍ اچوي. دا ډول غوماشې سهار د لمر ختو او ماښام د لمر لوېدو مهال ډېرې فعال وي.
ډینګي یو داسې ناروغي ده چې میکروب یې له یوه ناروغ څخه بل ته د غوماشي له لارې انتقالېږي. ډېنګي تبه په لومړي ځل په ۱۹۹۴کال کې په پاکستان کې ګډه شوه او تر هغه وروسته دغې ناروغۍ وخت په وخت د پاکستان په بېلا بېلو برخو کې ګڼ خلک وځپل.
د حشراتو پوهان یا انټامالوجیسټس وایي چې خلک باید د ډېنګي غوماشي وپېژني. د دې غوماشي پر بدن سپین ټکي وي. د ډېنګي تبې نښې دا دي چې پر سړي سخته تبه راځي، سر یې درد کوي، له خولې او له نسه شي او پر بدن یې سرې دانې وخېژي.
فورم \ دبحث خونه