په ننګرهار ولایت کې د طالبانو د حکومت سیمه ییز چارواکي وايي، د افغانستان او پاکستان ترمنځ د تورخم پوله چې د چهارشنبې په ورځ دسمبر شپږمه (لیندۍ ۱۵) د پاکستاني سرحد ساتونکو له خوا د مالونو د لیږدوونکو لاریو پر مخ تړل شوې وه، له څو ساعتونو وروسته بیرته پرانیستل شوه.
د ننګرهار د اطلاعاتو او فرهنګ رياست مسئولين وايي، دغه لاره يوازې د مالونو د لېږد رالېږد پر مخ تړل شوې وه او مسافرو کولای شول چې له دې لارې تګ راتګ وکړي.
په ننګرهار ولايت کې د طالبانو د حکومت د اطلاعاتو او فرهنګ رياست په تورخم کې د طالبانو د حکومت د کمیسار مولوي عصمت الله یعقوب له قوله د لارې د بندیدو علت د پاکستاني سرحدي ځواکونو له خوا د افغانستان په خاوره کې د یوې نوې دروازې د جوړیدو مخنیوی بللی و.
مولوي یعقوب ویلي چې تیره شپه ناوخته پاکستان غوښتل تورخم دروازې ته څېرمه د افغانستان طرف ۲۰ متره مخکې د لوحې په بهانه یوه بله دروازه جوړه کړي، چې دوی یې د جوړېدو مخه ونیوله.
مولوي یعقوب ویلي : "خو پاکستاني لوري د روازه د ترانزیټ پرمخ وتړله."
د طالبانو دغه چارواکي ویلي چې ددې ستونزې حل په موخه له پاکستاني چارواکو سره خبرو ته دوی چمتو دي تر څو ستونزه د خبرو له لارې حل شي. خو د راپورونو له مخې لاره د چهارشنبې د سهار راهیسې تړلې ده او تراوسه د دواړو خواو ترمنځ د لارې د بیرته پرانیستلو په اړه کومه پریکړه نه ده اعلان شوې.
پاکستان لا تراوسه د لارې د تړل کیدو او دا چې دا چې ولې دا لار تړل شوې څه نه دي ویلي.
دا لومړی ځل نه دی چې د تورخم لار د سوداګریزو توکو د انتقال پرمخ تړل کیږي.
دا لارد تیر نومبر د میاشتې په ۲۱ (لړم۳۰) هم پاکستاني مقاماتو د ترانزیټي سوداګرۍ په مخ بنده کړې وه، چې بیابېرته په همغه ورځ پرانیستل شوه.
پاکستان د نومبر په میاشت کې دا لار دغه هیواد ته په پاسپورټ او ویزه پرته پر افغانانو باندې د سفر د بندیز د پریکړې پراساس بنده کړې وه. هغه مهال پاکستاني سرحدي چارواکو د افغان لاریو د ډرایورانو څخه غوښتي و چې پاکستان ته د سفر پر مهال باید ددغه هیواد ویزه ولري.
د افغانستان د سوداګرۍ او پانګونې د خونې چارواکي وايي چې دمخه به افغان ډرایوران تر پیښور او پاکستاني ډرایوران د جلال اباد پورې د پاسپورټ او ویزو پرته تګ راتګ کاوه.
ددغې خونې د مدیره پلاوي غړي خان جان الکوزي امریکا غږ ته ویلي چې د افغانستان او پاکستان ترمنځ د سوداګرۍ او ترانزیټ د اپټا د قانون له مخې دواړه هیوادونه په تړون کې د هر ممکنه بدلون په اړه باید درې میاشتې دمخه یو بل ته خبر ورکړي.
هغه وویل، چې پاکستان حکومت د خپلو نویو کړنلارو د پلي کولو په اړه پرته د مخکینۍ اطلاع څخه دا نوې مقررات وضع کوي.
د تورخم لار په داسې حال کې تړل شوې چې د بلوچستان په ایالت کې د چمن – سپین بولدک په لار هم د پاکستان د حکومت له له خوا د سرحد دواړو خواو ته په تګ راتګ د نوو کړنلاړو د اعلان په مخالفت کې د سیمې اوسیدونکود څو اونیو راهیسې پرلت پیل کړی دی.
دا پرلت کوونکي د پاکستان حکومت د تازه پرېکړې سره د مخالف لپاره چې له مخې یې په دغې لارې باندې له ویزې او پاسپورټ پرته تګ راتګ ته اجازه نه ورکول کیږي اعتراضونه پیل کړي دي.
فورم \ دبحث خونه