د لاس رسي وړ اتصالات

پرکرونا ناروغۍ د اخته افغانانو شمیر ۲۴ ته ورسید


افغان حکومت وايي، چې په افغانستان کې د کرونا د ویروس پر ناروغۍ اخته ټول ناروغان له ګاونډي ایران څخه دغه هیواد ته ستانه شوي دي.

د عامې روغتیا وزارت نن د جمعې په ورځ ( حمل اول) د هرات په ولایت کې د کرونا د ویروس د ناروغۍ د دوو نوو پیښو د ثبت خبر ورکړی، چې ورسره په افغانستان کې پر دغې ناروغۍ د اخته کسانو شمیر ۲۴ ته رسیدلی دی.

د عامې روغتیا وزارت سلاکار او ویاند ډاکټر وحیدالله مایار خبریالانو ته ویلي، چې دا دوه ناروغان هم تازه له ایران څخه هرات ولایت ته ستانه شوي وو.

په افغانستان د کرونا د ویروس د ناروغۍ پیښې په اوو ولایتونو کې ثبت شوي، چې ۱۵ یې د هرات ولایت کې دي.همداشان درې په سمنګان ولایت کې، دوه د لوګر په ولایت کې او یوه، یوه پیښه په بلخ، بادغیس ، کاپیسا او دایکنډي ولایتونو کې ثبت شوې ده.

د عامې روغتیا وزارت د معلوماتو له مخې په افغانستان کې تر اوسه د دغه وزارت په لابراتورانو کې د کرونا د ویروس د ناروغۍ ټولې ۳۹۰ مشکوکې پیښې ثبت شوي، چې د ۲۴ پیښو لابراتواري نتیجې مثبتې او د پاتې نورو ۳۶۶ پیښو یې منفي وې.

د دغه وزارت ویاند او سلاکار وايي، چې اوس مهال په لابراتوارونو کې ۳۰ نورې مشکوکې پیښې هم تر ازموینې لاندې دي، چې پایلې به یې ژر خلکو سره شریکې شي.

د افغانستان عامې روغتیا وزارت د پنجشنبې په ورځ اعلان وکړ، چې د کابل د مرکزي لابراتورونو سربیره د هرات په ولایت کې هم د کرونا د ویروس د ناروغۍ د تشخیص لابراتواري مرکز کار پیل کړی دی.

دمخه به د کرونا مشکوکو پیښو نمونې له هرات څخه کابل ته راوړل کیدلې، چې نتیجو اعلان به یې وخت اخیست.

د عامې روغتیا وزارت وايي، په پام کې لري، چې د بلخ ولایت په مرکز مزارشریف ښار کې هم د دغې ناروغۍ د تشخیص لابراتواري مرکز ژر پرانیځي.

په افغانستان کې تراوسه د کرونا پر ناروغۍ اخته هیڅ ناروغ خپل ژوند له لاسه نه دی ورکړی.

د عامې روغتیا وزارت وايي، پر دغې ناروغۍ اخته لومړنی ناروغ په قرنطین کې د دریو اونیو د پاتې کیدو وروسته روغ شوی او خپلې کورنۍ ته ستون شوی دی.

د افغانستان عامې روغتیا وزارت وايي، تراوسه په دغه هیواد کې دننه د کرونا ناروغي په خلکو کې نه ده خپره شوې او پر دغې ناروغۍ اخته ناروغان ټول له ایران څخه افغانستان ته ستانه شوي دي.

XS
SM
MD
LG