د عربي متحده اماراتو او اسرائیل کمپینو د کرونا ویروس په هکله د څیړنو او مطالعاتو تړون لاسلیک کړی.
دغه تړون د شنبې په ورځ، اګست ۱۵ (زمري ۲۵) نا وخته د ابوظبي په ښار کې د د اپیکس ګروپ په نامه د عربي متحده اماراتو د ملي پانګې او د اسرائیل د تیرا ګروپ د شرکتونو تر منځ لاسلیک شو.
د اپیکس د شرکت رئیس خلیفه یوسف خوري په یوې اعلامیې کې د اسرائیل ددې شرکت سره په تړون خوښي ښودلې.
په اعلامیې کې د ښاغلي خوري د قوله ویل شوي، " دا د اسرائیل او عربي متحده اماراتو د سوداګرۍ د سکتورونو تر منځ لومړنی تړون ګڼل کیږي چې د دواړو هیوادونو د سوداګرو تر منځ د اقتصاد، سوداګرۍ او ګډ کار کولو په برخي کې د همکارۍ لپاره ګټور دی."
ښاغلي خوري همدارنګه ویلي چې د دې تړون له مخې به د کرونا د ویروس په هکله څیړنې او مطالعات وشي چې د بشریت سره مرسته کول دي.
دغه دواړه شرکتونه هڅه کوي چې د کرونا د ویروس د چټکو معایناتو لپاره وسایل چمتو کړي.
اپیکس په عربي متحده اماراتو کې د پانګې اچونې یو شرکت دی چې د روغتیا په برخه کې ځانګړی تمرکز لري.
د اسرائیل د تیرا ګروپ هم په دغه تړون خوښي ښودلې. د دې شرکت مشر، اورین سادیف په یوې اعلامیې کې ویلي چې دا تړون به دواړوو خواوو ته اقتصادي ګټې ولري.
اسرائیل او عربي متحده اماراتو د دې تړون نه وړاندې، د امریکا په منځګړتوب د بشپړو سیاسي اړیکو په پیلولو هم موافقه وکړله.
اسرائیل منلې وه چې د عربي متحده اماراتو سره د اړیکو د عادي کیدو په بدل کې به د خپل هغه پلان نه لاس په سر شي چې له مخې یې د لویدیځې قبضه شوې سیمې د اسرائیل د خاورې سره یو ځای کیدې.
اروپایي اتحادیې او یو شمیر عربي هیوادونو چې د لویدیځ پلویان دي، د اسرائیل د دې اقدام ستاینه کړې.
