د بیت المقدس په اړه د ملگرو ملتونو د عمومي اسامبلې په یوې بېړنۍ غونډه کې افغانستان د فلسطین او نورو مسلمانو هیوادونو د پریکړه لیک په ملاتړ رایه ورکړه.
که څه هم د ملگرو ملتونو د عمومي بیړنۍ غونډې رئیس په غونډه کې یو ځل اعلان وکړ چې افغانستان او مالي د بیت المقدس په اړه د پریکړه لیک نه خپل حمایت بریته واخیست. خو په ملگرو ملتونو کې د افغانستان د نمایندگۍ یو دیپلومات وویل چې افغانستان دغه پریکړه لیک ته مثبته رایه ورکړې او یوه تخنیکي تیروتنه ددې سبب شوی چې ددې پریکړه لیک نه د افغانستان ملاتړ حساب نشي.
د ملگرو ملتونو د عمومي اسامبلې ددې بېړنۍ غونډې سکرټرې د بیت المقدس په اړه د افغانستان موقف لومړی ناسم اعلان کړ خو څو شیبې وروسته یې هغه بیرته اصلاح کړ.
د ملگرو ملتونو په بېړنۍ غونډه کې چې د پنجشنبې په ورځ د بیت المقدس د وضعیت په اړه ددې سازمان په مقر کې جوړه شوه ١٢٨ هیوادونو د هغه پریکړه لیک په ملاتړ رایه ورکړه چې د ترکیې او یمن له لورې د فلسطین په ملاتړ لیکل شوی و.
په دې توګه افغانستان، عراق او پاكستان چې د امریکا نه د مرستو اخیستونکو په ډله کې دي د ښاغلي ټرمپ ګواښ ته په نه پام سره یې پریکړه لیک ته مثبته رایه ورکړه.
مصر او سعودي عربستان هم د پریکړه لیک له تاییدونکو. څخه دي. دغه پریکړه لیک که څه هم چې اجرايي ضمانت نه لري، خو د امریکا د دریځ په وړاندې یو مهم اقدام ګڼل کیږي.
د امریکا د متحده ایالاتو جمهور رئیس دونالد ټرمپ خبرداری ورکړی و چې د هغو هیوادونو سره به مرستې بندې کړي چې د اسرائیل د پایتخت په توگه د بیت المقدس په رسمیت پیژندنې په هکله د هغه د تصمیم مخالفت وکړي. افغانستان هر کال د امریکا نه په میلیاردونو ډالر مالي او پرمختیایي مرستې ترلاسه کوي.
په ملگرو ملتونو کې د پاکستان سفیرې د امریکا له لورې د اسرائیل د پایتخت په توگه د بیت المقدس د پیژندلو د غندنې په ترڅ کې له نړیوالې نه وغوښتل چې په ډله یزه توگه دغه تصمیم رد کړي.
په ملگرو ملتونو کې د بنگله دیش سفیر د بیت المقدس په اړه د اسلامي هیوادونو د همکارۍ د سازمان د اعلامیې نه ملاتړ وکړ او وویل چې د ختیځ بیت المقدس "پرته له کومې منازعې د فلسطین پایتخت" دی.
په دې سازمان کې د ایران سفیر اسرائیل د فلسطینیانو په وژنه او د هغوی د ځمکو په نیولو تورن کړ او وویل چې "د اسرائیل اشغال" په منځني ختیځ کې د ټولو کړکیچونو منبع ده.
په ملگرو ملتونو کې د مالیزیا استازي بیت المقدس ته د سفارت د انتقالولو په اړه د امریکا د متحده ایالاتو تصمیم د اندیښنې وړ وگاڼه او د بیت المقدس د ختیځ نه یې د فلسطینیانو د پایتخت په توگه ملاتړ وکړ.
د امریکا د متحده ایالاتو او اسرائیل په گډون د ملگرو ملتونو د سازمان نهو غړو هیوادونو دغه پریکړه لیک رد کړ. همداشان ۳۵ نورو هیوادونو دغه پریکړه لیک ته له رای ورکولو ډډه وکړه.