د لاس رسي وړ اتصالات

امریکایي کارپوهان کانګرس ته: افغانستان کې د امریکایي سرتیرو کمول تیروتنه ده


امریکا اوس مهال په افغانستان کې شاوخوا ۴۵۰۰ عسکر لري.
امریکا اوس مهال په افغانستان کې شاوخوا ۴۵۰۰ عسکر لري.

یو شمیر امریکایي کارپوهانو کانګرس ته ویلي چې په افغانستان کې د ۴۵۰۰ نه د امریکایي سرتیرو شمیر ۲۵۰۰ ته کمول، یوه تیروتنه ده.

د جمهور رئیس ډانلډ ټرمپ حکومت وروسته تر هغه چې کرسټوفر میلر یې د دفاع نوی سرپرست وټاکه، په افغانستان او عراق کې د خپلو عسکرو د شتون په هکله عمده تغیرات راوستل.

د دفاع سرپرست وزیر کرسټوفر میلر وویل، " د ۲۰۲۱ کال د جنورۍ تر میاشتې به په افغانستان کې زمونږ د سرتیرو شمیر ۲۵۰۰ ته ټیټ شي". د ۲۰۰۱ کال راپدیخوا چې امریکا په افغانستان کې جګړه پیل کړې، دومره لږ شمیر سرتیري یې په افغانستان کې نه و.

یو شمیر امریکایي کارپوهانو پرون د جمعې په ورځ، نومبر ۲۰ (لړم۳۰) د کانګرس غړیو ته په خبرو کې خبرداری ورکړ چې د عسکرو شمیر دومره کمول په چنې وهلو کې د امریکا تر ټولو مهمه وسله له منځه وړي.

د بهرنیو اړیکو په شورا کې سابقه لرونکی کارپوه سټیفن بیددل، د استازو مجلس د وسله والو خدماتو جرګه ګۍ ته وویل، "د عسکرو د ایستلو کومه پالیسي چې د سه شنبې په ورځ اعلان شوه، یوه سهوه ده. د ټرمپ حکومت چې کوم اعلان کړی د ناکامۍ قیمتي او پڅه نخسه ده".

یو شمیر کارپوهانو بیا د طالبانو او د امریکا تر منځ د سولې په تړون انتقاد وکړ.

په کابل کې د امریکا پخواني سفیر راین کراکر، د استازو د مجلس دغې کمیټې ته وویل چې د دې اقدام په نتیجه کې هیڅ هم نه تر لاسه کیږي.

هغه وویل، " مونږ د عسکرو د ایستلو په بدل کې هیڅ هم نه ترلاسه کوو. دا ستونزه د خبرو اترو د پیل نه موجوده وه. د افغانستان د حکومت د شتون نه پرته د طالبانو د استازو سره په یوې کوټې کې خبرو ته کښیناستل، هغوي د دې خبرو د پيل نه پدې پوهیدل چې دا خبرې اترې زمونږ د تسلیمدو په معنی دي. "

خو یو شمیر امریکایان بیا وایي چې نور د جګړې نه ستومانه شویدي. د کانګریس یو غړي براډلي بایرین وویل " خلک په افغانستان کې د نولس کلنۍ جګړې په هکله فکر کوي. هلته زرګونه امریکایان ووژل شول او ټپي شول. د سل ګونو زرو امریکایي عسکرو ژوند ګډوډ شو."

ښاغلي بایرین زیاته کړه چې د دې ټولو ستومانیو سره سره، د امریکا ولس ښایي د تروریزم سره د مبارزې د هڅو ملاتړ وکړي. د کانګرس دا غړی وایي چې ولس نه غواړي القاعده په افغانستان کې کنټرول تر لاسه کړي.

یو شمیر کارپوهان بیا وایي د افغانستان حکومت د القاعده د شبکې سره په جګړې بوخت دی خو بل پلو بیا طالبانو داسې کوم اقدام ندی کړی چې په ښکاره توګه وښیي هغوي د القاعده سره خپلې اړیکې پرې کړیدي.

د ستراتیژیکو او نړیوالو مطالعاتو په مرکز کې کارپوه، سیټ جونز پدې هکله وویل، " دا زما د پاره یوازې د ترهګرۍ سره د مبارزې موضوع نه، بلکه د افغانستان د حکومت د ړنګیدو مخنیوي هم دی. ۲۵۰۰ عسکر یا ۴۵۰۰ او یا هم ۵۰۰۰ عسکر مونږ ته څه راکوي؟"

ښاغلي جونز زیاته کړه چې د سولې پرته د نورو امریکایي عسکرو ایستل په افغانستان کې د واک توازن ګډوډوي او نظامي برخې به د طالبانو، او د القاعده د شبکې په شمول د نورو وسله والو ډلو په ګټه شي.

XS
SM
MD
LG