د کندهار په معروف ولسوالۍ کې نن شنبه تر غرمې مخکې د ملي اردو د یوې هلیکوپټرې د لوېدو پېښه کې دوه تنه وژل شوي او شپږ نور ټپیان دي.
د کندهار يوه لوړ پوړي امنيتي مقام د نوم نه ښودلو په شرط اشنا راډيو ته وويل چې هلیکوپټرې معروف ولسوالۍ ته اکمالات کړي و چې د بېرته الوتنې پرمهال یې د تخنیکي ستونزې له امله سقوط کړی دی.
د کندهار چارواکي وايي په دې اړه څېړنې کوي
پر همدې مهال د کندهار والي ویاند عزیز احمد عزیز هم اشنا راډیو ته د پېښې په تائید سره وویل چې یادې هلیکوپټرې معروف ولسوالۍ ته اکمالات کول چې لوېدلې ده.
عزیز وویل چې په دې اړه د دوی څېړنې روانې دي او وروسته به له رسنیو سره معلومات شریک شي.
خو تر اوسه لا معلومه نه ده چې د هليکوپترې عملې ته هم کوم زيان رسېدلی او کنه.
معروف د کندهار په جنوب ختيځ ۱۸۰ کېلو مترۍ کې له پاکستان سره پر پوله نا امنه ولسوالي ده.
دا په روان کال کې د افغان هوايي پوځ اتمه هلیکوپټر ده چې د تخینکي ستونزو له امله سقوط کوي.
دا مطلب هم ولولئ فراه کې د افغان پوځ هلیکوپټر سقوط کړی، ۲۵ تنه وژل شويتر دې مخکې په یوې تازه پېښه کې د فراه په انار درې ولسوالۍ کې د افغان هوايي پوځ د یوې هلیکوپټرې د لوېدو پېښه کې ۲۵ ملکي او نظامي چارواکي ووژل شول.
ولې په اوو میاشتو کې د افغان پوځ ۷ الوتکې وغورځېدلې؟
که څه هم افغان چارواکي ډېر کله د هلیکوپټرو د لوېدو لامل تخنیکي ستونزې یادوي خو د افغانستان د هوايي ځواکونو پخواني قوماندان عتیق الله امرخېل تېره میاشت له امریکا غږ سره خبرو کې وویل چې یادې هلیکوپټرې د مسلکي او مجربو کسانو د نشتوالي او کموالي له کبله غورځېږي.