د لاس رسي وړ اتصالات

بغلان کې د قند پر فابریکې د طالبانو برید پر شا تمبول شوی ـ چارواکي


د بغلان د قند فابریکه د پلخمري له مرکز څخه په ۲۵ کیلومترۍ کې په مرکزي بغلان ولسوالۍ کې موقعیت لري

د بغلان امنیتي چارواکي وايي، ددې ولایت د قند پر فاریکې د وسله والو طالبانو برید پر شا تمبول شوی دی.

د بغلان د امنیه قوماندانۍ ویاند جاوید بشارت نن دوشنبه اپرېل ۱۹ (وري ۳۰) امریکا غږ ته وویل د وسله والو طالبانو لخوا د تیرې شپې برید د څو ساعتونو لپاره دوام درلود.

ښاغلي بشارت زیاته کړه چې په دغه نښته کې شپږ وسله وال طالبان وژل شوي او اته تنه نور ټپیان شوي دي.

د نوموړي په وینا د تیرې شپې په نښته کې دوه افغان امنیتي منسوبین هم وژل شوي او شپږ تنه نور ټپیان شوي دي.

د بغلان د امنیه قوماندانۍ ویاند وویل چې وسله والو طالبانو غوښتل د قند فابریکې اړوند صنعتي شهرک ونیسي، خو په وینا یې پدې کار ونه توانېدل.

د بشارت د معلوماتو په اساس په دغه نښته کې د قند فابریکې کار کوونکو ته مرګ ژوبله نه ده اوښتې او مالي زیانونه هم نه دي رامنځته شوي.

د بغلان د قند فابریکه د پلخمري له مرکز څخه په ۲۵ کیلومترۍ کې په مرکزي بغلان ولسوالۍ کې موقعیت لري.

وسله والو طالبانو تر دا مهاله په دې اړه څه نه دي ویلي.

XS
SM
MD
LG