د متحدو ایالتونو د پوځ مرکزي قومنداني د «حماسي غضب» په عملیاتو کې د یو بل سرتېري د وژل کېدو خبر هم ورکړ. په دې سره په تېرو دوو ورځو کې د دغې قومندانۍ په وینا دا څلورم امریکايي سرتېری دی چې په روانو عملیاتو کې وژل کېږي.
د مرکزي قومنداني په اعلامیې کې ویل شوي دي چې دغه سرتېری د ایران په بریدونو کې ژوبل شوی و او وروسته یې د ټپونو له کبله ساه ورکړه.
اعلامیه وايي چې جنګي عملیات روان دي. د وژل شوي سرتېري هویت تر ۲۴ ساعتونو پورې نه اعلانېږي.
ډونالډ ټرمپ: د حماسي غضب د عملیاتو ساری نه دی لیدل شوی
د امریکا د متحدو ایالتونو ولسمشر ډونالډ ټرمپ د یکشنبې په ورځ د مارچ اول د ایراني رژیم پر وړاندې د امریکا او اسراییلو د ګډ پوځي ماموریت، د حماسي غضب عملیاتو د لومړیو ۳۶ ساعتونو په اړه ویډیوي بیان خپور کړ.
ولسمشر ټرمپ په فلوریډا کې د خپل استوګنځي مار-ا-لاګو له څخه په خپله وینا کې، د ایران د رژیم لخوا د په نښه شویو هدفونو په اړه توضیحات وکړل او ژمنه یې وکړه چې د ایران رژیم په غچ اخیستونکو بریدونو کې د دریو امریکایي سرتیرو د مرګ غچ به واخلي.
ولسمشر ټرمپ یو ځل بیا یې د رژیم په پاتې امنیتي ځواکونو غږ وکړ چې تسلیم شي او که نه نو د مرګ سره به مخ شي.
ولسمشر ټرمپ وویل د وژل شویو امریکایانو د وینو غچ به واخلي.
ولسمشر ټرمپ: موږ د ایران د سمندري ځواک ۹ کښتۍ ډوبې کړې
د امریکا د متحدو ایالتونو ولسمشر،ډونالډ ټرمپ، د ایران د رژیم د سمندري ځواک د ۹ کښتیو د له منځه وړلو او ډوبېدو خبر ورکړ.
ډونالډ ټرمپ د یکشنبې په ورځ، د مارچ په لومړۍ نېټه، د ټروت سوشیل په ټولنیزې شبکې کې لیکلي: «همدا اوس راته خبر راکړل شو چې موږ د ایران د سمندري ځواک ۹ کښتۍ، چې ځینې یې نسبتاً لویې او مهمې وې، له منځه وړي او ډوبې کړې دي.»
ولسمشر ټرمپ زیاته کړه: «موږ په پاتې نورو پسې هم ګرځو – هغوی به هم ډېر ژر د سمندر تل ته ولېږدول شي.»
ډونالډ ټرمپ همدارنګه لیکلي: «موږ په بله حمله کې د هغوی د سمندري ځواک مرکز هم تر ډېره حده ویجاړ کړی دی.»
له دې وړاندې په بندرعباس کې د سختو چاودنو په اړه خبرونه او ویډیوګانې خپرې شوې وې.
د امریکا د مرکزي قوماندانۍ یا سنټکام د ایکس پر ټولنیزې شبکې باندي پر ایران د امریکا او اسراییلو د ګډو عملیاتو په اړه پوست خپور کړی چی وایي:
«تیره شپه، د امریکا (B-2) ډوله پوځي بم غورځوونکو جت الوتکو، چې په ۲,۰۰۰ پونډه بمونو سمبالې وې، د ایران د بالستیکو توغندیو تاسیسات چې په کلکه یې ساتنه کیدله، په نښه کړل. هېڅ هېواد باید هېڅکله د امریکا پر هوډ شک ونه کړي.»