د متحدو ایالتونو د وسله والو ځواکونو عمومي لوی درستیز دن کین په پنټاګون کې د ایران رژیم په ضد د امریکايي ځواکونو د حماسي غضب عملیاتو په اړه وویل چې امریکایي ځواکونو په تېرو څو ورځو کې د ایران په هوايي او سمندري ظرفیتونو او د میزایلو د توغوونې په مرکزونو بریدونه کړي او دا بریدونه به په راتلونکو څو ورځو کې نور هم زیات شي.
نوموړي په عربي هېوادونو باندې د ایران بریدونو ته په اشارې وویل چې دغو هېوادونو د ایران ډېر بریدونه خنثی کړي دي او یو شمېر بې پیلوټه الوتکې یې وېشتلي دي.
د متحدو ایالتونو د جګړې وزیر پیټ هګسیټ په پنټاګون کې د ایران رژیم په ضد د امریکايي ځواکونو د حماسي غضب د عملیاتو په اړه تازه معلومات ورکړل.
پیټ هګسټ وویل چې د ایران د رژیم مشرتابه، هوايي او سمندري ځواکونه، پوځي تاسیسات او د سپاه پاسداران د سوق مرکزونه له منځه تللي.
اسرائیل د سهشنبې په ورځ (مارچ درېیمه) د لبنان سوېلي سیمو باندې ځمکنی برید پیل کړ او په بیروت کې یې د حزبالله په بنسټونو نوې هوايي حملې وکړې، دا په داسې حال کې ده چې د لبنان حکومت د ایران له ملاتړ څخه برخمنې دې ډلې د پوځي فعالیتونو بندول اعلان کړل.
د اسرائیل د دفاعي ځواکونو په خپل اېکس حساب کې په یوه بیان کې لیکلي چې ځواکونه یې"د لبنان په جنوب کې عملیات کوي" او "د پرمختللي دفاعي حالت د یوې برخې په توګه سرحدي سیمې ته نږدې په څو نقطو کې ځای پر ځای شوي دي" او "د حزب الله د ترهګریزې زیربنا په ضد هدفي بریدونه" کوي.
قطر د سې شنبې په ورځ د مارچ درییمه، اعلان وکړ چې ځواکونو یې له ۱۰۰ څخه زیات ایراني توغندي شنډ کړي دي، او د دغه هېواد حکومت په سیمه کې د ایران دوامداره یرغل غندلی دی.
د قطر د دفاع وزارت اعلان وکړ چې ۲۴ ایراني ډرونونه یې هم ویشتلې دي.
قطر د ملګرو ملتونو د امنیت شورا ته په یوه پیغام کې، وویل چې د ایران لخوا د امریکا او اسرائیل د بریدونو په ځواب کې د سیمې په هیوادونو بریدونه "د تاوتریخوالي د نه منلو وړ زیاتوالی" دی.
