په کانګرس کې د جمهوري غوښتونکي ګوند غړو د ایران د جګړې په اړه د امریکا د متحدو ایالتونو ولسمشر ډونالډ ټرمپ د چهارشنبې ورځې وینا وستایله. دا پداسې حال کې ده چې د کانګرس دیموکراتو غړو ویل ولسمشر د راتلونکې لارې او پلان په اړه هېڅ وضاحت وړاندې نه کړ.
د امریکا د کانګرس جمهوري غوښتونکي سناتور لینډسي ګراهام وویل ټرمپ امریکایانو ته “یو قانع کوونکی وضاحت وړاندې کړ چې ولې موږ اړ شو چې د دې ناوړه رژیم پر وړاندې اقدام وکړو” او ایران ته یې خبرداری ورکړ چې له متحدو ایالتونو سره دې خبرې وکړي، که نه نو د نورو پوځي اقداماتو سره به مخ شي.
د امریکا د متحدو ایالتونو ولسمشر ډونالډ ټرمپ وویل چې ایران هڅه کوله خپل اټومي پروګرام بېرته جوړ کړي او هدف یې د وسلو جوړول وو. هغه وویل د ایران بالستیک توغندي ډېر ژر د امریکا او اروپا لپاره خطر پېښولای شوای.
د ایران د جګړې په اړه د ولسمشر ټرمپ وینا ته غبرګونونه
ولسمشر دونالد ترمپ د پنجشنبې په ورځ (اپریل اول) ایران ته خبرداری ورکړ چې د متحدو ایالتونو پوځ به د هغه هیواد د پلونو او د بریښنا د تاسیساتو په ګډون پر مهمو اهدافو بریدونه زیات کړي.
سپینه ماڼۍ وايي چې د متحدو ایالتونو او ایران ترمنځ د اوربند په اړه د پاکستان لخوا خپره شوې طرحه د "ګڼو نظرونو څخه یو نظر دی" چې ولسمشر ټرمپ یې د ایران د ترهګر رژیم پر وړاندې د اسرائیل سره د خپلو ګډو پوځي عملیاتو د سملاسي پای ته رسولو لپاره په پام کې لري.
د سپینې ماڼۍ یوه چارواکي په دې اړه امریکا غږ ته یو بیان استولی چې پکې راغلی د پاکستان طرحه "د کنو نظرونو څخه یو نظر دی چې ولسمشر پرې د تائید مهر ندی لګولی."
دغه چارواکي دا هم ویلي چې د حماسي غضب عملیات به دوام مومي او ټرمپ به په دې اړه د دوشنبې په ورځ په سپینې ماڼۍ کې د خپل خبري کنفرانس پر مهال نور جزئیات وړاندې کړي. دغه خبري کنفرانس د واشنګټن ډي سي په وخت تر غرمې وروسته په یوې بجې رابلل شوی دی.
امریکا د متحدو ایالتونو ولسمشر ډونالډ ټرمپ په ایران کې د یوه امریکايي پېلوټ ژغورل د امریکا په تاریخ کې یو بېساری ماموریت بللی دی.
ولسمشر ټرمپ د یکشنبې په ورځ [اپرېل ۵مه] په خپلې ټولنیزې شبکې، ټروت سوشل کې لیکلي چې دغه "مېړنی جنګیالی د ایران په خطرناکو غرونو کې د دښمن د لیکو شاته و." ده زیاته کړه چې د امریکا ملکي او پوځي مشرتابه اجازه ورنکړه چې "دښمنان" دې دغه پوځي ته زیان ورسوي.
ټرمپ یادونه کړې چې: "هغه [پېلوټ] ژوبل شوی خو جوړ به شي."
