د امریکا د مرکزي ځواکونو قومندان جنرال کینټ مکنزي له امریکا سره د سولې تړون ته د طالبانو پر ژمنتیا شک ښودلی او ویلي یې دي چې د دغه تړون تر بشپړ تطبیق پورې دې امریکايي ځواکونه په افغانستان کې پاتې شي.
جنرال مکنزي چې د چهارشنبې په ورځ د جون په ۱۰ (غبرګولي ۲۱) د منځني ختیځ په انسټیټیوټ کې د ویډیو کنفرانس له لارې خبرې کولی وویل امریکا باید په تم شي او وویني چې طالبان څه کوي.
د متحده ایالاتو دغه لوړپوړی جنرال وایي د افغانستان نه په بشپړه توګه د ځواکونو د ایستلو په هکله یې سپارښتنه داده تر هغه جې طالبانو د القاعده شبکې سره اړیکې نه وي پریکړي په افغانستان کې دې پاته شي.
جنرال مکنزي د امریکا او طالبانو ترمنځ د سولې تړون ته په اشارې چې د روان کال د فبرورۍ په ۲۹ په دوحې کې لاسلیک شو وویل: "لا تراوسه ماته څرګنده نه ده چې هغوی (طالبانو) په بشپړ ډول دا مسله منلې او مخکې تګ ته چمتو دي".
له افغانستان څخه د امریکايي ځواکونو وتل د امریکا – طالبانو ترمنځ د سولې د تړون یوه مهمه برخه ده. جنرال مکنزي ټینګار وکړ چې متحده ایالتونه په دې تړون عمل کوي او تر راتلونکې عیسوي میاشتې پورې به په افغانستان کې د خپلو ځواکونو شمېر ۸۶۰۰ ته راټیټ کړي.
هغه زیاته کړه: "موږ غواړو له هغه مهالویش څخه مخکې واوسو چې لاسلیک کړی مو دی".
جنرال مکنزي وویل په هغه صورت کې چې شرایط برابر وي متحده ایالات به خپل ټول سرتیري د راتلونکي عیسوي کال تر مې میاشتې پورې له افغانستان څخه وباسي، خو نوموړي په دې تړاو چې په رښتیا به داسې شرایط برابر شي شک څرګند کړ.
هغه ټینګار وکړ: "صادقانه ووایم که زما نظر غواړی دا شرایط تر اوسه په بشپړ ډول نه دي برابر شوي".
د امریکا – طالبانو ترمنځ د سولې د تړون یوه بله مهمه برخه له تروریستي ډلو په ځانګړي ډول القاعدې شبکې سره د طالبانو د اړیکو پریکول دي، چې په دې اړه د امریکا د مرکزي قواو قوماندان د شک په څرګندولو سره وویل، طالبان دغو ډلو ته په افغانستان کې د ژوند کولو اجازه ورکړې ده.
له دې وړاندې ملګرو ملتونو په یو راپور کې ویلي و چې طالبان د دوحې د سولې د تړون د بریالي کېدو پر وړتیا شک لري او له همدې امله په دغې ډلې کې درزونه رامنځ ته شوي چې دا د هغوی له مخالفینو سره تعامل ستونزمن کوي.
د دغه راپور په اساس لږ تر لږه د لوړ پوړو طالبانو یوې ډلې د سولې له احتمالي توافق سره په مخالفت کې د "اسلامي ولایت حزب" په نوم یوه نوې ډله جوړه کړې ده.
په دې راپور کې د استخباراتي سرچینو له قوله راغلي چې د طالبانو په منځ کې د مخالفتونو د زیاتولي او د تندو غبرګونونو د ښودلو له ویرې د طالبانو رهبرۍ له امریکا سره د سولې د تړون جزئيات نه دي افشا کړي.
جنرال مکنزي ویلي چې که څه هم طالبان د کروناویروس د وبا تر اغیزې لاندې راغلي خو لا هم د بریدونو د ترسره کولو هڅې کوي.
خو نوموړي منلې چې طالبانو پر خپلې دې ژمنې عمل کړی چې د سولې د تړون په اساس پر امریکايي او د ناټو په چوکاټ کې د قاطع ملاتړ ماموریت پر ځواکونو به بریدونه نه کوي.
هغه یو ځل بیا ټینګار وکړ چې طالبان باید متحده ایالاتو ته خپله ژمنتیا ثابته کړي.