د امریکا او افغانستان حکومتونو په ګډه له افغانستان سره د امریکا د متحدو ایالتونو د ملکي مرستو د بیا ارزولو خبر ورکړی دی.
د ملکي مرستو د بیا ارزولو لومړنۍ غونډه د سه شنبې په ورځ (مۍ۱۴) په کابل کې وشوه چې د امریکا د بهرنیو چارو وزارت مرستیاله الیز ویلس، د افغانستان اجرايي رئیس عبدالله عبدالله او د مالي وزارت سرپرست محمد همایون قیومي په کې برخه اخیستې وه.
په کابل کې د امریکا د سفارت په اعلامیې کې ویل شوي دي چې دا ارزونه د ولسمشر غني په غوښتنې کیږي چې "د ستراتیژیکو همکاریو، د افغانستان حکومت د پراختیایې لومړیتوبونو سره همغږۍ، او د لاسته راوړنو او ستونزو د پیژندلو په برخو باندې متمرکزه ده".
په اعلامیه کې ویل شوي نه دي چې امریکا هرکال له افغانستان سره څومره ملکي مرستې کوي، خو وايي چې واشنګټن د افغانستان د ځان بسیاینې لپاره "د روغتیا، پوهنې، اقتصادي ودې، انرژۍ، زیربنایي سکټورونو همداشان د بشردوستانه او د کلتوري میراثونو د ساتنې په برخو" کې غیر نظامي مرستې کوي.
سیګار وايي له ۲۰۰۲م راهېسې امریکا په افغانستان کې شاوخوا ۹۰۰میلیارد ډالر لګولي چې ډېر یې په نظامي برخه کې وو.
په اعلامیه کې ویل شوي دي چې له کابل سره به د واشنګټن مرستې د نړیوالې ټولنې د هڅو په چوکاټ کې کیږي چې هدف یې د افغانستان اقتصادي وده او افغان ولس سره مرسته ده.
الیز ویلس څو ورځې مخکې کابل ته تللې او تر دغې غونډې مخکې یې له ولسمشر غني سره هم لیدلي، پر سولې او د جمهوري ریاست په روانو انتخاباتو یې ورسره خبرې کړي دي.
امریکا د افغانستان حکومت تر ټولو ستره مالې ملاتړې ده. ټاکل شوې چې دا ارزونه همدغې میاشتې (مۍ) په اخره کې وشي.
