د پاکستان په بلوچستان ایالت کې د ماین چاودنې له امله د یو افسر په ګډون پنځه پاکستاني عسکر وژل شوي دي.
د پاکستان د پوځ مطبوعاتي ادارې (ISPR) په یوې اعلامیې کې ویلي چې دغه چاودنه پرون یکشنبه ډسمبر ۲۵مه په «کاهان» سیمه کې د پوځي عملیاتو پرمهال رامنځته شوې ده.
په اعلامیه کې ویل شوي په دغه چاودنه کې د پوځ د افسر فهد په ګډون د لانس نایک امتیاز، اصغر، مهران او شمون په نومونو څلور نور پاکستاني عسکر وژل شوي دي.
د پوځ مطبوعاتي ادارې د معلوماتو له مخې پاکستاني سرتیرو په «کاهان» سمیه کې د استخباراتي معلوماتو پر بنسټ د وسله والو پر ضد پوځي عملیات پیل کړي و چې یاده چاودنه رامنځته شوې ده.
د یو بل خبر له مخې تېره ورځ د بلوچستان ایالت په ژوب سیمه کې هم د وسله والو پر ضد عملیاتو کې د حق نواز په نوم یو پاکستانی سرتیری وژل شوی او دوه تنه نور ټپیان شوي دي.
د بیان له مخې په دغه عملیاتو کې یو وسله وال کس هم وژل شوی او څو تنه ژوندي نیول شوي دي.
د پاکستان پوځ مطبوعاتي ادارې د معلوماتو له مخې پاکستاني سرتیرو د ژوب اړوند په «سمبازا» سیمه کې له افغانستان څخه د وسله والو را اوښتلو اطلاع تر لاسه کړې وه چې او په وړاندې عملیات پيل کړي و.
د بلوچستان په «کاهان» سیمه کې پر پاکستاني سرتیرو د چاودنې مسؤلیت تر دا مهاله کومې وسله والې ډلې نه دی منلی.
د پاکستان صدراعظم شهباز شریف د بلوچستان ایالت اړوند «کاهان» سیمه کې پر پاکستاني سرتیرو چاودنه غندلې ده او د عاملینو د پیدا کېدو ژمنه یې کړې ده.
پر همدې مهال د بلوچستان ایالت په کوټه ښار کې هم د پاکستاني پولیسو پر امنیتي پوستو د لاسي بمونو غورځولو راپورونه ورکړل شوي دي.
د پاکستاني رسنیو د معلوماتو له مخې په دغه بریدونو کې درې پاکستاني پولیس او ۱۲ ملکي وګړي ټپیان شوي دي.
د بلوچستان ایالت اړوند په خضدار او تربت سمیه کې پر پاکستاني سرتیرو د بریدونو راپورونه ورکړل شوي، خو د مرګ ژوبلې په اړه یې تر دا مهاله څه نه دي ویل شوي.
دا په داسې حال کې ده چې د تیرې شنبې په ورځ په تربت سیمه کې د ناڅرګندو وسله والو په برید کې د (ایف سي) څلور عسکر وژل شوي و.
په روانه ډسمبر میاشت کې د پاکستان له حکومت سره د تحریک طالبان پاکستان (TTP) د اوربند د پای ته رسېدو تر اعلان وروسته په بلوچستان ایالت او نورو سیمو کې پر پاکستاني سرتیرو چاودنې او بریدونه زیات شوي دي.