د روسیې صدراعظم وايي، مسکو چمتو دی، چې په افغانستان کې تر خپل کار لاندې نیمګړو پروژو باندې پانګونه وکړي.
دیمتري میدویدوف پرون جمعه د نومبر پر لومړۍ نېټه په تاشکند کې د شانګهای د همکارۍ سازمان د غونډې په څنډه کې د افغان حکومت له اجرائیه رئیس عبدالله عبدالله سره کتنه کې ویلي، چې هېواد یې چمتو دی،په افغانستان کې خپلې تېرې طرحې بشپړه کړي.
د اجرائیه ریاست لخوا رسنیو ته د لېږل شوې اعلامیې لهمخې د روسیې صدراعظم د کابل او مسکو ترمنځ د سوداګریزې راکړې ورکړې پر کمېدو د اندېښنې په ښودلو سره د دواړو هېوادونو ترمنځ د سوداګریزو اړیکو د پراخېدو غوښتنه کړې ده.
د روسیې صدراعظم ویلي: "روسیه چمتو ده، چې په افغانستان کې تر کار لاندې پروژو باندې پانګونه وکړي او ترڅنګ یې خپلې تېرې طرحې هم تکمیلي کړي."
ښاغلي میدویدوف د افغان سولې له بهیر څخه د ملاتړ په ښودلو سره په افغانستان کې د ژر تر ژره سولې او ثبات رامنځته کېدو هیله ښودلې ده.
هغه همدارنګه له افغانستان سره د خپلو مرستو په دوام په ټینګار سره ویلي، چې هېواد به یې په فرهنګي، تحصیلي، د نظامي افسرانو روزلو او له مخدره موادو سره د مبارزې په برخه کې خپلو مرستو ته دوام ورکړي.
ښاغلي عبدالله هم له نوموړي سره کتنه په افغانستان کې د روسیې له پانګونې څخه هرکلی کړی دی او ویلي یې دي: "افغانستان د دواړو هېوادونو ترمنځ د سوداګریزې راکړې ورکړې د زیاتېدو هرکلی کوي."
اجرئیه رئیس همدارنګه د افغان سولې په اړه د روسیې له هڅو په مننې سره ویلي، چې په افغانستان کې د نړیوالو متحدانو او مسکو له همکارۍ پرته سوله نشي راتلی.
عبدالله عبدالله همدارنګه د شنبې په ورځ د «لړم پر۱۱مه» د شانګهای همکارۍ سازمان په اتلسمه غونډه کې د وینا پرمهال په دغه سازمان کې د افغانستان د بشپړه غړیتوب غوښتنه وکړه.
روسیه چین، هند، پاکستان، ازبکستان، تاجکستان، قزاقستان قرغزستان د شانهګای سازمان دایمي غړي دي او د افغانستان په ګډون ایران او بلاوروس پکې د ناظر په توګه ګډون کوي.
