د افغانستان کرکټ بورډ وايي چې د ۲۰۲۴ زېږدیز کال د کرکټ د شل اوریز جام د کوربه توب لپاره یې هڅې پیل کړي دي او د دې سریز ترسره کېدو لپاره یو معیاري لوبغالي ته اړتیا ده چې دوی یې د جوړولو لپاره چمتوالی نیولی دی.
د بورډ مشر فرهان یوسفزي نن چهارشنبه (زمری ۸/جولای۲۹) په یوې خبري ناستې کې وویل چې د کابل کرکټ سټدیوم جوړولو لړۍ یې د کابینې تصویب پورې رسولې.
هغه زیاته کړه: "د اختر وروسته به کابینه په دې اړه پرېکړه وکړي."
ښاغلي یوسفزي زیاته کړه چې دغه لوبغالی به د نړیوالو معیارونو پر بنسټ جوړیږي او د جوړېدو وروسته به کرکټ بورډ ته یوه لویه عایداتي سرچینه اوسي.
د کرکټ بورډ مشر په بورډ کې د یو لړ اصلاحاتو یادونه هم وکړه.
هغه وویل د ځینو کسانو معاشونه یې پرې بند کړي چې په "تشریفاتي ډول" یې بورډ کې معاشونه ترلاسه کول.
د یوسفزي په وینا د روان مالي کال په اوږدو کې د کرکټ بورډ بودیجوي ستونزې نه لري او د مثبت لوري ته روان دی.
له دې مخکې د افغانستان پر کرکټ بورډ کې د یو لړ مالي فساد تورونه هم و چې اوسنۍ اداره یې په حلولو ټینګار کوي.
