د لاس رسي وړ اتصالات

افغانستان د مسکو د سولې په مذاکراتو کې ګډون نکوي


طالبانو منلې چې د مسکو د سولې په خبرو کې برخه اخلي

په داسې حال کې چې طالبان د مسکو د سولې خبرو ته خپل استازي استوي، کابل وايي د افغانستان د سولې په اړه د مسکو په مذاکراتو کې ګډون نکوي.

د افغانستان د بهرنیو چارو وزارت وايي د دې سره سره چې کابل-مسکو ښه روابط لري، خو افغان حکومت په روسیې کې د سپتمبر په څلورمه د افغانستان د سولې په تړاو مذاکراتو ته کوم استازی نه استوي.

د وزارت ویاند صبغت الله احمدي د چهار شنبې په ورځ (زمري ۳۱ مه )امریکا غږ سره په خبرو کې دا وضاحت ورنکړ چې ولې افغانستان د مسکو مذاکراتو ته استازي نه استوي، خو ټېنګار یې وکړ چې باید د افغانستان د سولې په اړه هر مذاکرات د افغان حکومت په مشرۍ مخ ته ولاړ شي.

ښاغلي احمدي وویل "په ځانګړي ډول د سولې بهیر باید د افغانستان او افغانستان د حکومت تر مشرۍ لاندې وي. د مسکو په ناسته کې ټاکل شوې نه ده، چې مونږ ګډون وکړو".

نوموړي وویل افغان حکومت د روسیې سره ښې اړیکې لري او وخت ناوخت د افغانستان په اړه ځینو مسائلو کې له یو بل سره مشورې هم کوي، خو په دغه غونډه کې برخه نه اخلي.

په همدې حال کې د افغانستان د ملي امنیت د شورا سلاکار حنیف اتمر د روسیې له سفیر الکساندر مانتیسکي سره کتلي او له هغه یې غوښتي چې "پر وسله والو طالبانو فشار راوړي چې له افغان حکومت سره مخامخ مذاکرات پیل کړي."

د امنیت د شورا په اعلامیې کې ویل شوي دي چې د روسیې سفیر ویلي دي چې "هېواد یې چمتو دی د افغانستان د سولې پروسې د بري لپاره له افغان حکومت سره مرسته وکړي."

د روسیې د بهرنیو چارو وزیر سیرګي لاروف د سه شنبې په ورځ وویل، چې د سپتمبر په څلورمه په مسکو کې د افغانستان د سولې په تړاو په خبرو کې وسله والو طالبانو ته د ګډون بلنه ورکړل شوې او هغوی هم منلې ده.

ښاغلي لاروف هیله ښودلې چې د مسکو د سولې خبرې به ګټورې وي. ښاغلي لارف وویل" لومړی غبرګون مثبت و، هغوی (طالبان) په مذاکراتو کې د ګډون پلان لري".

د روسيې د بهرنیو چارو وزیر طالبانو سره خپلې اړیکې په افغانستان کې د روسیې وګړو د خوندیتوب لپاره د خپلو هڅو برخه وګڼله او ويې ویل چې کوښښ کوي طالبان له جګړې لاس اخیستلو او افغان حکومت سره خبرو ته وهڅوي.

XS
SM
MD
LG