د خيبر پښتونخوا د مانسهرې په خاکي کمپ کې له څلورو لسيزو راهیسې مېشت افغان کډوال وایي، په تنګو کورونو کې ژوند کول ورته ډیر سخت شوي خو د سیمې د چارواکي لخوا ورته د کورونو د پراخولو اجازه نشته.
د حمیدالله په نوم ځوان وايي، د کورنۍ ۸۰ تنه غړي یې په ۱۲ کوټو کې اوسیږي. د حمیدالله پلار وايي، کله چې پاکستان ته مهاجر شو، درې وروڼه وو، چې د وخت په تېرېدو سره یې د کورنۍ شمېر زیات شو. وایي، خټین کورونه دي چې دپاسه یی نور پوړونه جوړول ناشوني دي خو د کور د پراخولو حق نه لري.
هغه زیاته کړه: "هغه کومه ساحه چې مونږ نیولې وه، د دې نیت سره چې بیرته به خپل هیواد ته ولاړ شو نو هم داسې پاتې شو اوس زمونږ ځای ډیر تنګ شوی."
د پکتيا ولايت نجيب الله وايي، چې دوی د ځمکې د اخيستلو او ودانولو اجازه نه لري. هغه وايي: "کورونه ورځ تر بلې تنګیږي او د کور د غړو شمېر ډېرېږي، خو موږ ته د کورونو جوړولو لپاره د ځای اخیستلو اسانتیا نشته."
په دې اړه د افغان کډوالو عالي کمېشنر عباس خان، وايي، چې د ۱۹۷۰ راهیسې د افغان کډوالو لپاره جوړ شوی قانون تر اوسه نه دی څېړل شوی او نه هم پکې بدلون شوی، چې دغه ستونزه یې رامنځته کړې.
عباس خان وایي، ددې ستونزې د هواري دپاره کار روان دي. هغه زیاته کړه: "دا ځمکه شخصي ځمکه ده او د هغې لپاره قانون جوړ شوی خو چا په قانون کې تعدیل نه دی کړی چې کومې سیمې د خلکو لپاره ځانګړې شوې دي، باید د خلکو د شمېر د ډیریدو سره پکې بدلون وشي."
په خاکي کمپ کې ۱۷۰۰ کورنۍ ژوند کوي، چې د وګړو شمېر یې شاوخوا ۱۹ زره دی.
اوس مهال په پاکستان کې شاوخوا درې میلیونه افغان کډوال ژوند کوي، چې زیاتره یې کډوالو ته په ځانګړیو شویو کمپونو کې اوسیږي.
