د چین د هانګژو په اسیايي لوبو کې افغان تکواندوکار محسن رضايي په ۵۸ کیلوګرامه وزن کې خپلو تاجیکستاني او جاپاني سیالانو ته له ماتې ورکولو سره د برونز مډال وګاټه.
د افغانستان د تکواندو د ملي فدراسیون رئیس نجیب الله سکندر په خپله فیسبوک پاڼه کې دغه مډال "تاریخي او ارزښتناک" بللی دی.
د اسیايي لوبو په لړ کې چې اوسمهال د چين په هانګژو ښار کې روانې دي، رضايي په لومړۍ لوبه کې خپل تاجیکستاني سيال ته دوه – صفر ماتې ورکړه او بيا په دویمه لوبه کې یې خپل جاپانی سيال په دوه پرله پسې پړاونو کې مات کړ.
رضايي خپل قزاقستاني سیال ته په ماتې ورکولو سره د افغانستان لپاره د برونزو مډال ګټل یقیني کړ. خو نن په دریمه لوبه کې يې د خپل سویلي کوريا سيال جانګ جون څخه، چې د نړۍ اتل دى، ماتې وخوړه او په دې سياليو کې له مخکې تګ څخه پاتې شو.
د افغانستان د تکواندو فدراسیون د رئیس په وینا، د رضايي لاس په تېرو سیالیو کې کسر کړی و، خو ددې سره سره، نوموړی له خپل سیال څخه یواځې د دوو نمرو په توپیر شاته پاتې شو.
د سکندر په وينا، دا د چين د هانګژو په اسيايي لوبو کې د افغانستان د ٨٥ کسيز ورزشي کاروان لومړى مډال دى. خو تر اوسه د اسيايي لوبو په ويبپاڼه کې د افغانستان نوم د مډال ګټونکو هېوادونو په منځ کې نه دی ليدل شوی.
محسن رضايي دوه کاله مخکې، د اسیا د تکواندو د ۲۴ دورې سیالیو اتلولي خپله کړه او پدې توګه یې د لومړي ځل لپاره افغانستان ته د سرو زور مډال وګټه.
همداراز، ټاکل شوې ده چې نن به یو بل افغان تکواندو کار، صدرزاده بیجان له خپل تاجیکستاني سیال سره مخامخ شي.
فورم \ دبحث خونه