د افغانستان ولسمشر محمد اشرف غني د اقلیمي بدلون په اړه ناستې کې وویل چې افغانستان په مجموعي ډول له اوبو، باد او لمر نه د ۳ سوه زره میګاواټه برېښنا د تولید ظرفیت لري.
د ارګ نه په خپرې شوې ویډیو کې راغلي چې ولسمشر غني نن یکشنبه ډسمبر ۱۳ (لیندۍ۲۳) په دغې انلاین غونډې کې ویلي چې افغانستان د پاکۍ برېښنا د تولید ظرفیت نه د ښه مدیریت په پایله کې ګټه اخیستلی شي.
خو دا چې افغانستان تر اوسه د برېښنا په تولید کې د خپل ظرفیت نه څومره ګته اخیستې ده، د حکومت ارقام ښیي چې د برېښنا د تولید په برخې کې ۲۱ فیصد ظرغیت نه ګټه اخیستل شوې ده.
د افغانستان د برېښنا شرکت وايي، چې افغانستان د پاکې برېښنا د تولید په برخې کې د اوبو نه تر ټولو ډېره ګټه اخلي.
د یاد شرکت ویاند وحید الله توحیدي نن امریکا غږ ته وویل: "په مجموعي ډول افغانستان د اوبو، لمر او باد نه تر ۶۵۰ میګاواټه برېښنا تولیدوي."
ښاغلی توحیدي زیاتوي چې دغه کچه د کال په موسومونو کې یو شان نه ده او ۶۵۰ میګاواټه برېښنا هغه مهال تولیدیږي چې باران او واوره ډېره وورېږي.
د برېښنا شرکت د معلوماتو پر بنسټ افغانستان په عمده ډول د اوبو د بندونو نه او په لږه کچه د لمر نه برېښنا تولیدوي. د باد په برخې کې افغانستان د خپل ظرفیت نه ډېره لږه ګټه اخیستې. برېښنا شرکت وايي چې دغې برخې کې له یو میګاواټ نه لږه برېښنا له لمر نه ترلاسه کیږي.
د افغانستان د حکومت ارقامو ته په کتو افغانستان د برېښنا د تولید په برخې کې د خپل ظرفیت نه ۲۱ سلنه ګټه اخیستې ده.
دا په داسې حال کې ده چې افغانستان د برېښنا په کارولو کې یو مصرفي هېواد هم دی او له خپلو شمالي ګاونډیو نه برېښنا واردوي.
له دې مخکې د اوبو د چارو د تنظیم ملي ادارې امریکا غږ ته ویلي و چې اوس مهال د اوبو د اتو بندونو د جوړولو چارې روانې دي.
پاشدان، کمال خان، بخش اباد، شورابک، مچلغو او شاه او عروس بندونه په دغو لویو پروژو کې شامل دي.