د پاکستان پوځ وايي د روژې په خاطر او د افغان چارواکو په غوښتنه یې افغانستان ته د چمن دروازه پرانیستله.
دا دروازه څه موده مخکې د پاکستاني او افغان ځواکونو ترمنځ له نښتې وروسته د پاکستان سرحدي ځواکونو وتړله.
دروزاه له هغې وروسته وتړل شوه چې د افغان ځواکونو په ادعا د پاکستان د سرشمېرنې یوه ډله د ډیورېنډ کرښې افغان غاړې کې د لقمان او جانګیر کلیو ته ننوتله او هلته یې د خلکو سرشمېرنه وکړه، خو افغان ځواکونو یې مخه ونیوله.
بیا دواړو خواو ډزې وکړې او په دواړو خواو کې ځواکونه او ولسي خلک ووژل شول.
اوس جنګ بند دی او د پاکستان د پوځ اعلامیه وايي چې اوربند به روان وي.
پاکستان وايي ځواکونه به یې د "نړیوال سرحد" په اوږدو کې د لقمان او جانګیر کلیو کې خپلو مورچلونو ته بېرته ورګرځي.
تراوسه افغان چارواکو په دې اړه څه نه دي ویلي، خو د کندهار د امنیې قومندان جنرال رازق ويلي وو چې د کابل او اسلام اباد لوړ پوړي چارواکي به دغه ستونزه حلوي.
د افغانستان او پاکستان ترمنځ د ډیورېند شاوخوا ۲۶۰۰ کیلیو مېتره کرښه کښل شوې ده، اسلام اباد یې له افغانستان سره خپل رسمي سرحد ګڼي خو کابل یې نه مني.