د لاس رسي وړ اتصالات

دوه افغان لوبغاړي د ویسټ انديزو کورنیو سیالیو ته وپېرودل شول


تصویرو د ویسټ انډیز د کورنیو سیالیو له رسمي ویپاڼې اخیستل شوی دی

د افغانستان د کرکټ د ملي لوبډلې لوبغاړي محمد نبي عیسي خیل او راشد خان د ویسټ انډیز په کورنیو سیالیو ( سي پي ال) کې د لوبېدو لپاره وپېرودل شول.

د افغانستان د کرکټ د ملي لوبډلې لوبغاړي محمد نبي عیسي خیل او راشد خان د ویسټ انډیز په کورنیو سیالیو ( سي پي ال) کې د لوبېدو لپاره وپېرودل شول.

دوی لومړني افغانان دي چې په دغو سیالیو کې پېرودل کیږي. د سي پي ال د ویپاڼې د معلوماتو په اساس محمد نبي په ۹۰ زره او راشد خان په ۶۰ زره ډالرو وپېرودل شول. پېټریاټز لوبډلې محمد نبي او امازون واریرز راشد خان وپېرودل.

د لوبغاړو بولي د جمعې په ورځ د ویسټ انډیز په باربوداز کې وشوه.

دا د افغانستان د کرکټ په تاریخ کې دویم ځل دی چې دوه افغان لوبغاړي په دومره لوړ قیمت په بهرنیو کلپونو کې د لوبېدو لپاره پېرودل کیږي.

تر دې مخکې د هند سن رایزر حیدر اباد لوبډلې راشد خان په ۴۰۰ لکه او نبي په ۳۰ لکو هندۍ روپیو وپېرودل چې د آی پي ال په مشهور سیالیو کې ولوبیږي.

د ویسټ اندیز په کورنیو سیالیو کې د څه باندې ۲۵۰ نړیوالو او کورنیو لوبغاړو نومونه ثبت شوي چې له دې ډلې به یې شاوخوا ۱۰۰ لوبغاړي اخیستل کیږي.

پر نبي او راشد سربېره د افغانستان د نوروز منګل، نجیب ځدراڼ او اصغر ستانکزي نومونه هم د دغو سیالیو لپاره ورکړل شوي وو، خو هغوی وانخیستل شول.

د کارابین سیالۍ د همدغه کال د جون او اګسټ په میاشتو کې کیږي چې شپږ لوبډلې په کې له یو بل سره سیالۍ کوي.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG