د لاس رسي وړ اتصالات

درې افغان لوبغاړي په موقت ډول له لوبو بند کړل شول


د افغانستان کرکټ بورډ درې افغان لوبغاړي، نجیب ترکي، افتاب علم او نورالحق د لسو، څلورو او دوو میاشتو لپاره له لوبو بند کړل.

دغه درې لوبغاړي په کابل کې د میلیون لیګ تجارتي سیالیو په یوې لوبې کې د لوبڅار له لوري د کرکټ د نړیوالو قوانینو او اصولو په ماتولو پړه وبلل شول.

د کرکټ بورډ د نظم او ډسپلین کمېټې مشر هستي ګل عابد د سه شنبې په ورځ( مۍ ۲) په کابل کې دغو دریواړو لوبغاړو ته سزا واوروله. نجیب ترکی د لسو میاشتو او افتاب علم د څلورو میاشتو لپاره له نړیوالو او کورنیو لوبو او نورالحق ملکزی یوازې د دوو میاشتو لپاره له کورنیو لوبو بند کړل شول.

ښاغلی عابد وايي دغه درې واړه لوبغاړي به په دغې مودې کې د افغانستان د کرکټ بورډ له ټولو امتیازاتو څخه محروم وي.

څو ورځې مخکې د یوې لوبې پر مهال نجیب ترکي له لفظي شخړې وروسته پر فرید ملک د بیټ ګوزار وکړ او هغه یې ژوبل کړ چې لوبڅار د هغه دا کار د کرکټ د نړیوالو اصولو خلاف وباله.

د نجیب ترکي د لوبډلې دوو نورو غړو افتاب علم او نورالحق ملکزي د لوبڅار پر دغې پرېکړې اعتراض وکړ او قوي غبرګون یې وښود چې دا کار د کرکټ د نړیوالو اصولو خلاف وبلل شو.

لوبڅار د دوی قضیه د نظم کمیټې ته وسپارله او کمېټې دا سزا ورکړه.

ښاغلي هستي ګل عابد د نظم او ډسپلین د کمېټې له نورو غړو سره یو ځای دغو لوبغاړو ته دا سزا اعلان کړه چې ویډیو یې د کرکټ بورډ پر رسمي فیسبوک پاڼې هم خپره شوې ده.

ښاغلی عابد وايي دا لوبغاړي دوه ورځې وخت لري چې د دغې پرېکړې پر ضد اعتراض وکړي.

دا اول ځل دی چې د افغانستان کرکټ بورډ په یو وار درې لوبغاړي له لوبو منع کوي. نجیب ترکی د افغانستان اوپنر، افتاب علم باولر او نور الحق ملکزی مډل ارډر بیټسمن دی.

دغو لوبغاړو ته داسې مهال دا سزاوې ورکول کیږي چې د کرکټ نړیوالې شورا د افغانستان بل لوبغاړی محمد شهزاد محمدي، د منع کړل شویو درملو د خوړلو له کبله، په موقت ډول له لوبو منع کړل شوی.

دا په داسې حال کې ده چې ټاکل شوې د جون په میاشت کې د افغانستان ملي لوبډله له ویسټ انډیز سره درې د ۲۰ اورونو او درې یوه ورځنۍ نړیوالې لوبې وکړې.

  • 16x9 Image

    جعفر هاند

    جعفر هاند په ۲۰۱۷ کې په واشنګټن ډي سي کې په امریکايي پوهنتون کې په نړیوالو مطبوعاتو او اړیکو کې ماستري کړې ده. لومړۍ ماستري یې په ۲۰۱۳ کال کې (له لېرې واټن- Distance Learning) د هند په اندرا ګاندي پوهنتون کې په سیاسي علومو کې کړې ده. د ننګرهار په پوهنتون کې یې قضا لوستې ده. له ۲۰۰۷ نه تر ۲۰۱۴ کاله پورې د بي بي سي د نړیوالې او افغان څانګې خبریال او پروډیوسر و. د ۲۰۱۴ کال له پیل راهیسې په واشنګټن کې د امریکا غږ اشنا راډیو/تلویزون خبریال دی. 

XS
SM
MD
LG