د افغانستان کرکټ پریمیر لیګ ته د لوبغاړو د اخیستو مراسم راتلونکې دوه شنبه (سپتمبر ۱۰) نیټه په متحده عربي اماراتو کې دي.
د افغانستان کرکټ بورډ په یوې اعلامیې کې ویلي دي چې د لوبغاړو د اخیستو په دې مراسمو کې به د نړۍ د کرکټ ۳۵۰ لوبغاړي شامل وي.
اعلامیه زیاتوي چې دوی ته د افغان لوبغاړو په ګډون له پاکستان، بنګلادېش، سریلنکا، ویسټ انډیز، سویلي افریقا، اسټرالیا، ایرلېنډ، زمبابوې، متحده عربي امارات، سکاټلنډ، هانګ کانګ، عمان، نیپال او کاناډا نه د لوبغاړو نومونه رارسیدلي چې د افغانستان د کرکټ لیګ کې به ترې غوره لوبغاړي غوره شي.
کرکټ بورډ وايي چې لوبغاړي په پنځو برخو وېشلي دي چې ګوریو، آیکان، سرو زرو، سپینو زرو، الماس، نقرې او د دویمې او دریمې درجې هیوادونو لوبغاړو په کې شامل دي.
تراوسه معلومه نه ده چې په دغو لوبغاړو کې د کومو او څومره افغان لوبغاړو نومونه شامل دي.
د افغانستان د کرکټ پریمیر لیګ د ۲۰۱۸ کال د اکتوبر له ۵ نیټې څخه تر ۲۱ نیټې په متحد عربي اماراتو کې ترسره کیږي.
دا لومړی ځل دی چې د افغانستان کرکټ بورډ دا سیالۍ له افغانستان نه بهر ترسره کوي.
د افغانستان د کرکټ پریمیر لیګ لپاره د لوبډلو د اخیستو بهیر تیره ورځ پای ته ورسید چې پکې پنځه ټیمونه برخه لري.
