د افغانستان د ټاکنو خپلواک کمېسیون وايي، د ولسمشریزو ټاکنو وروستۍ پایلې به تر راتلونکو درې یا څلورو ورځو پورې اعلان شي.
د دغه کمېسیون کمېشنر محمد حنیف دانشیار نن دوشنبه «سلواغې۲۸مه» خبریالانو ته وویل چې د ټاکنو کمېسیون ۹۰سلنه پرېکړو د ټاکنیزو شکایتونو د کمېسیون له پرېکړو سره مطابقت لاره او ستونزه پکې نه وه.
د افغانستان د شکایتونو کمېسیون دوې اونۍ مخکې د استېنافي اعتراضونو د څېړلو په اړه خپلې پایلې د ټاکنو له کمېسیون سره شریکې کړې چې پکې د شکایتونو کمېسیون د پرېکړې په اساس د۱۳۷۶۳۰ مشکوکو رایو ۱۰ سلنه او ۱۰۲۰۰۰ تر وخت مخکې ثبت شوو رایو ۱۵سلنه بیا ارزولو غوښتنه شوې وه.
ښاغلي دانشیار وویل: "د ټاکنیزو شکایتونو کمېسیون لخوا چې د لسو او ۱۵سلنو د تطبیق په اړه کومې پرېکړې شوي وې، د دغو فیصیدو له مخې ۹۰سلنه یې د ټاکنو د خپلواک کمېسیون د شوو پرېکړو سره مطابقت درلود او ستونزه پکې نه وه."
هغه زیاته کړه: "تاسو ته ډاډ درکولای شم چې تر راتلونکو درې یا څلورو ورځو پوري به د ټاکنو وروستۍ پایلې اعلان کړو."
د ټاکنو کمېسیون مسؤلین وايي چې له له ټاکل شوي وخت څخه مخکې او مشکوکو رایو ځانګړی تفتیش چې تېره ورځ پیل شوی و نن دوشنبه پای ته ورسېد.
د افغانستان د ټاکنو کمېسیون دغه کمېشنر د «ثبات او همپالنې» ټېم د یو شمېر پلویانو او مشرانو د ګواښونو په اړه د یو خبریال د پوښتنې په ځواب کې وویل چې کمېسیون خپلې چارې د افغانستان له قوانینو سره سمې مخته وړي او زیاته یې کړه چې سیاسي فشارونه به د دغه کمېسیون پر کارونو کومه اغېزه ونه کړي.
دا په داسې حال کې ده چې تېره اونۍ د ولسمشر غني لومړي مرستیال او د جنبش اسلامي ګوند مشر جنرال عبدالرشید دوستم ګواښ وکړ که چیري د ټاکنو پایلې د دولت جوړونکي ټېم په ګټه اعلان شي، موازي حکومت به اعلان کړي.
تېره ورځ د افغانستان د سولې عالي شورا رئیس او د وحدت اسلامي ګوند مشر کریم خلیلي هم وویل که ټاکنې د دوی په ګټه اعلان نشي د عبدالله عبدالله په مشرۍ موازي حکومت به رامنځته کړي.
د افغان حکومت اجرائیه رئیس او د ولسمشریزو ټاکنو کاندید عبدالله عبدالله نن د وزیرانو شورا په غونډه کې وویل چې د ټاکنو د پایلو په اړه د ده او د « ثبات او همپالنې» ټاکنیز ټېم د مشرانو دریځ یو او روښانه دی.
د افغان ولسمشریزې ټاکنې چې له تر سره کېدو یې شااوخوا څلور میاشتې تېریږي تر دا مهاله یې وروستۍ پایلې نه دي اعلان شوي.