د افغانستان د دفاع وزارت وايي دامریکا د نوې تګلارې له مخې په افغانستان کې پر طالبانو، داعش جګړه مارانو او نورو اورپکو د امریکايي ځواکونو بمباریو ښه نتیجه ورکړې ده.
د وزارت ویاند جنرال دولت وزیري وايي چې د بهرنیو ځواکونو هوايي بمبارۍ له افغان حکومت سره په سلا مشورې کیږي. په افغانستان کې امریکايي ځواکونه وايي تېره میاشت- اګست- یې د طالبانو او داعش پر مورچلو او جنګیالیو ۷۵۱ هوايي بمونه غورځولي چې په تېرو اوو کلونو کې تر ټولو زیات بلل کیږي.
ښاغلي وزیري وویل د دغو بمونو ۸۵ فیصده پر وسله والو طالبانو او ۱۵ فیصده یې د داعش پر جګړه مارانو غورځول شوي دي.
د امریکا د هوايي ځواکونو مرکزي قومانده وايي دغه بمبارۍ د ولسمشر دونالد ټرمپ د نوې تګلارې په اساس شوي. ولسمشر ټرمپ د افغانستان په جګړې کې محدودیتونه لېرې کړي او امریکايي ځواکونو ته یې واک ورکړی چې د "دښمن" د ماتولو لپاره اړین اقدامات وکړي.
ښاغلي وزیري ونه ویل چې په دغو بمباریو کې څومره وسله وال طالبان او د داعش جګړه ماران وژل شوي دي.
جنرال وزیري داسې مهال دا څرګندونې کوي چې په همدې ورځ د افغانستان د ملي امنیت مشاور محمد حنیف اتمر هم پر ترهګرو ډلو د بمباریو د زیاتولو غوښتنه وکړه.
په ۲۰۱۴ کال کې په افغانستان کې د بهرنیو ځواکونو جنګي ماموریت ختم شو، خو داسې ښکاري چې لا هم د ناټو او په خاص ډول امریکايي ځواکونه له طالبانو سره په جنګ دي.
امریکا له ۲۰۰۱ لومړي کال راوروسته په افغانستان کې د نړیوال تروریزم په ضد ماموریت مشري کوي، چې په دغه موده کې یې شاوخوا ۲۴۰۰ عسکر وژل شوي او زرګونه نور یې ژوبل شوي دي.