د افغانستان او بنګله دېش تر منځ د درې یو ورځنیو لوبو د لړۍ په لومړنۍ لوبه کې، د چهارشنبې په ورځ جولای پنځمه (چنګاښ ۱۴) بنګله دیش افغانستان ته د ۱۷۰ منډو هدف وټاکه.
د ډي ایل ایس د پرېکړې په اساس افغانستان د دې لوبې د ګټلو دپاره په ۴۳ اورونو کې ۱۶۴ منډو ته اړتیا لري.
د بنګله دېش په چټاګانګ بندري ښار کې د دې لوبې پچه افغان لوبډلمشر حشمت الله شهيدي وګټله او لومړی يې د بالینګ پرېکړه وکړه.
د افغانستان تیز بالر فضل الحق فاروقي په نهو اورونو کې ۲۴ منډې ورکړې او د بنګلدېش درې لوبغاړي یې وسوځول.
راشد خان په نهه اوورونو کې ۲۱ منډې ورکړې او د بنګله دېش دوه لوبغاړي یې وسوځول. مجیب الرحمن هم په نهو اوورونو کې ۲۳ منډې ورکړې او دوه لوبغاړي یې وسوځول.
د بنګله دېش د بیټینګ په برخه کې توحید هریدوی ترټولو زیاتې منډې وکړې. هغه په ۶۹ توپونو د ۵۱ منډو کولو وروسته د فضل الحق فاروقي په توپ وسوځېد.
د بنګله دېش کپتان او پرانیستونکی توپ وهونکی تمیم اقبال چې په دغه لوبه کې د ښه لوبېدو تمه ورڅخه کېدله، په ۲۱ توپونو باندې د ۱۳ منډو کولو وروسته د فضل الحق فاروقي په توپ وسوځېد.
د بنګله دېش بل پرانیستونکی توپ وهونکی لینټن داس په ۳۵ توپونو باندې د ۲۶ منډو کولو وروسته د مجیب الرحمان ځدران په توپ وسوځېدل.
د بنګله دیش د توپ وهنې په جریان کې لوبه دوه ځله د باران په وجه د ځنډېدو له کبله له پنځوسو اوورنو څخه ۴۳ اوورونو ته راکمه شوه.
افغانستان تېر کال د فبروري په میاشت کې له بنګله دیش سره د درې یو ورځنیو لوبو لړۍ ۲-۱ بایللې وه. دواړو خواوو ټولټال اته یو روځنۍ لوبې کړي چې درې د افغانستان او پنځه د بنګله دېش په ګټه تمامې شوې دي.
د افغانستان لوبډله: حشمت الله شهیدي (کپتان)، رحمت شاه، رحمان الله ګربز، ابراهیم ځدراڼ، نجیب الله ځدراڼ، محمد نبي، راشد خان، عظمت الله عمرزی، مجیب الرحمن، فضل الحق فاروقي، محمد سلیم صافی.
د بنګله دیش لوبډله: تمیم اقبال (کپتان)، لیټن داس، نجم الحسین، شکیب الحسن، مشفیق الرحیم، توحید هریدوی، عفیف حسین، مهدي حسن میراز، تسکین احمد، مستفیض الرحمان، حسن محمود.