د افغان ولسمشر ویاند صدیق صدیقي وايي، د سولې په اړه طرحه د ملي اجماع او د ولسمشر غني د تېرو پنځه کلونو کوښښونو لهمخې رامنځته شوې ده.
صدیق صدیقې پر داسې مهال دا څرګندونې کوي، چې اجرائیه رئیس عبدالله عبدالله د فرانسې له خبري اژانس سره خپل تازه مرکه کې د سولې په اړه د ولسمشر غني طرحه 'غیر واقعي' ګڼلې ده.
د ولسمشر غني ویاند صدیق صدیقي د چهارشنبې په ورځ د نومبر پر ۶مه «لړم۱۵مه» پر خپل ټوېټر لیکلي: "د سولې په اړه د ولسمشر محمد اشرف غني اوه مادیزه طرحه په افغانستان کې د سولې د ټینګښت په اړه اوه روښانه او واضح نقطې لري."
دا په داسې حال کې ده، چې د افغانستان د ملي امنیت شورا سلاکار حمدالله محب تېره اونۍ له طالبانو سره د سولې په اړه د ولسمشر غني اوه مادیزه طرحه اعلان کړله.
ښاغلي محب وویل، چې د سولې په نوې طرح کې افغان حکومت په ښې حکومتوالۍ تمرکز کړی دی او له دې لارې هڅه کوي، ترڅو د افغانستان د خلکو غوښتنو ته زیاته پاملرنه وشي.
له طالبانو سره اوربند، له پاکستان سره د خبرو مراحل او په دغه هېواد کې د ترهګرو د روزنځایونو بندول، د دغه طرحې نورې مهمې مادې دي.
دا په داسې حال کې ده، چې عبدالله عبدالله پرون سې شنبه (اکتوبر ٥) د فرانسې د خبري اژانس سره په خبرو کې د دې طرحې اهمیت او جدي والی تر پوښتنې لاندې راوستلی دی.
ښاغلي عبدالله ویلي:"صادقانه ووایم، هیچا دغه طرحه د یو پروگرام په توگه جدي نه ده نیولې...دغه (طرحه) له بل هر څه ډیر د هیلو یو لست دی. هیڅوک دغه طرحه جدي نه نیسي-نه د افغانستان خلک او نه بل څوک."
ښاغلي صدیقې تر دې مخکې هم د عبدالله عبدالله ورته څرګندونو ته په غبرګون کې ویلي و، چې: "اوس د سیاسي پوهې وخت دی."
