د لاس رسي وړ اتصالات

کابل کې د میدان وردګ پر ښاروالې وسله وال برید شوی


ظریفه غفاري

د میدان وردګو پر ښاروالۍ ظریفه غفاري د کابل ښار د پنځمې امنیتي حوزې اړوند خوشحال خان مېنه کې وسله وال برید شوی دی.

د کابل د امنیه قوماندانۍ ویاند فردوس فرامرز امریکا غږ ته وویل چې دغه پېښه نن یکشنبه ۱:۳۰ شوې ده.

هغه وویل په دغه برید کې مېرمن غفاري ته زیان نه دی رسېدلی او یو امنیتي پلاوی د څېړنو لپاره د پېښې ځای ته استول شوی دی.

د افغانستان د کورنیو چارو وزارت هم ویلي چې د پېښې د عاملینو د نیولو هڅې روانې دي.

تر دا مهال د دغه برید مسؤلیت کوم شخص او یا کومې وسله والې ډلې په غاړه نه دی اخیستی.

میرمن غفاري څو اونۍ مخکې د امریکا د بهرنیو چارو وزارت له خوا د نړۍ د زړورو ښځو جایزه تر لاسه کړه.

د امریکا د بهرنیو چارو وزارت له تېرو ۱۴ کلونو راهیسې د « IWOC» په نوم د زړورو ښځو جایزه د نړۍ په کچه هغه مېرمنو ته ورکوي چې د سولې، عدالت، بشري حقوقو څخه د دفاع، جنسیتي برابرۍ او د ښځو د ظرفیت لوړولو په برخه کې هلې ځلې کړي وي.

د میدان وردګ ښارواله مېرمن ظریفه غفاري په ۱۳۹۷ کال کې د ازاد رقابت له لارې د میدان وردګ ولایت د مرکز ښارواله شوه.

آغلې غفاري دغې دندې ته تر بریالي کېدو وروسته پنځه میاشتې په کابل کې وه او ویلې وه چې د ځینو ستونزو له امله ورته د کار اجازه نه ورکول کیږي.

نوموړې هغه مهال امریکا غږ ته ویلي وو چې له دې کبله چې ښځه ده، له کار سره یې مخالفتونه کیږي.

XS
SM
MD
LG