د کرکټ په نړیوال جام سیالیو کې د چهارشنبې په ورځ اکتوبر ۲۵ (لړم درېیمه) استرالیا هالنډ ته د ۳۰۹ منډو په توپیر ماتې ورکړه چې د کرکټ نړیوال جام په تاریخ کې تر ټولو ستره ماتې ګڼل کیږي.
په دې ۵۰ اوریزه سيالۍ کې چې د هند په ډیلي کې ترسره شوه، استراليا لومړۍ توپ وهنه وکړه او په ٥٠ اورونو کې يې د اتو لوبغاړو په سوځېدو سره د هالنډ لوبډلې ته د ٤٠٠ منډو هدف وټاکه.
په دې سیالۍ کې د استرالیا ال راونډر لوبغاړي ګلین مکسویل په ۴۰ توپونو سلیزه ووهله، چې دا په پنځوس اوریز نړیوال جام کې نوی ریکارډ دی. مکسویل ټولټال ۱۰۶ منډې وکړې.
د ده تر څنګ ډیویډ وارنر وتوانید چې ۱۰۴ منډې جوړې کړي او د دې هدف په ټاکلو کې ستر رول ولوبوي.
خو د هالنډ د ملي لوبډلې لوبغاړي، چې تر دې مخکې یې د جنوبي افریقا پیاوړې لوبډلې ته ماتې ورکړې وه، د استرالیا د بالرانو په وړاندې ونه توانیدل او یو په بل پسې وسوځېدل.
هالنډ په ۲۱ اورونو کې یوازې ۹۰ منډې جوړې کړې او ټول لوبغاړي یې وسوځېدل.
دا لوبه د نړیوال جام په تاریخ کې تر ټولو ستر بری دی. له دې وړاندې، استرالیا د ۲۰۱۵ په نړیوال جام کې له افغانستان څخه د ۲۷۵ منډو په توپیر لوبه ګټلې وه.
په روان جام کې افغانستان تر اوسه پنځه لوبې کړي او دوه یې ګټلې دي. په روان مقدماتي پړاو کې د افغانستان څلور لوبې پاتې دي، چې راتلونکې لوبه یې د دوشنبې په ورځ د سري لانکا په خلاف ده او د نومبر په اوومه له استرالیا سره مخامخ کیږي.
فورم \ دبحث خونه