د لاس رسي وړ اتصالات

بایډن: افغانستان د امپراتوریو 'هدیره' ده، خو د 'وحدت وړتیا' نلري


په سپینه ماڼۍ کې د جو بایډن خبري کنفرانس

د متحده ایالاتو ولسمشر جو بایډن، د چهارشنبې په ورځ جنورۍ ۱۹ (مرغومي ۲۹) د افغانستان څخه د امریکایي ځواکونو د بشپړ ایستلو په اړه د خپل تصمیم نه دفاع وکړه او وویل چې یو حکومت نشي کولای دا هیواد اداره کړي.

ښاغلي بایډن د خپلې واکمنۍ د لومړي کال د کالیزې په درشل کې په سپینه ماڼۍ کې خبریالانو ته په خطاب کې وویل وویل: "که فکر کوئ چې څوک کولای شي افغانستان د یو حکومت لاندې متحد کړي، خپل لاسونه پورته کړئ. دا [هیواد] په یو ټینګ دلیل سره د امپراتوریو هدیره دی. دا [هیواد] د وحدت وړتیا نلري."

ښاغلي بایډن پدې خبري کنفرانس کې یو ځل بیا د افغانستان څخه د امریکا په مشرۍ نړیوالو ځواکونو د بشپړه وتلو څخه دفاع وکړه او وویل چې امریکا په افغانستان کې په یوه اونۍ کې یو میلیارد ډالر لګښت درلود او دغه لګښت د ۲۰کالو راهیسې دوام درلود.

ولسمشر بایډن همداشان وویل پدې باندې په پوهیدو چې په افغانستان کې بریالیتوب یو غیر معمول کار دی او لا زیات جسدونه متحده ایالاتو ته انتقالیدل، د ځواکونو وتل په هر پړاو کې نشو کیدای چې اسان واوسي.

د متحده ایالاتو ولسمشر پدې خبري کنفرانس کې همداشان وویل چې د هغو ښځو او نارینو په اړه چې د کابل په نړیوال هوایي ډګر کې د ترهګریزو بریدونو په وجه ووژل شول جدي اندیښنه لري، خو وویل چې د افغانستان څخه د متحده ایالاتو د ځواکونو د بشپړه ایستلو د تصمیم په هکله عذر نه غواړي.

ښاغلي بایډن وویل که له افغانستان څخه یې د متحده ایالاتو ځواکونه په بشپړه توګه نه وای ایستلی اوس به ناچاره وای چې لا نور ځواکونه هغه هیواد ته واستوي.

د افغانستان څخه د متحده ایالاتو په مشرۍ د ځواکونو د ایستلو طریقه چې د ګډوډیو سره مل وه، د امریکا په یو شمیر سیاسي کړیو کې پرې انتقادونه کیږي. خو ولسمشر بایډن په وار وار ویلي چې د هغه څه مسولیت چې په افغانستان کې پیښ شول په غاړه اخلي او نه غواړي د هیواد راتلونکي نسلونه یې افغانستان ته واستول شي.

ښاغلي بایډن د افغانستان اوسني وضعیت ته په اشارې وویل: "آیا هغه څه چې د طالبانو د بې کفایتۍ له وجې پیښیږي، بد حس لرم؟ هو لرم یې" خو په عین وخت کې یې وویل چې هغه د مختلفو پراخو پیښو په اړه چې په نړۍ کې پیښیږي، هم بد حس لري او ټینګار یې وکړ چې "مونږ نشو کولای چې ټولې ستونزې حل کړو."

XS
SM
MD
LG