د چمن – سپین بولدک لارې له بیا خلاصېدو سره نن د ورځې له شروع څخه بیا تر لس نیمو بجو پورې ۸۰۰۰ کسان د افغانستان او پاکستان تر منځ تګ راتګ کړی دی.
پرون د جمعې په ورځ تر څلور میاشتني ځنډ وروسته د افغانستان او پاکستان ترمنځ یاده لاره په دايمي ډول بيرته پرانیستل شوه.
د چمن – بولدک لار د دواړو هیوادونو ترمنځ یوه له تر ټولو مهمو تجارتي او اقتصادي لارو څخه شمېرل کیږي.
په جنوبي حوزه کې د بهرنيو چارو وزارت نماينده ګي وايي چې د لارې د پرانيستل کيدو په برخه کي د بهرنيو چارو وزير حنيف اتمر ځانګړې هڅې کړي.
د نوموړي ادارې رئيس ظاهر الکو نن شنبه اګست ۲۲مه (وږې لومړۍ) امریکا غږ ته وويل: "د بهرنیو چارو وزارت او د وزارت د مشرتابه ښاغلي محمد حنيف اتمر له هڅو وروسته يو ځل بيا د جمعې په ورځ ياده دروازه د دواړوهیوادونو په موافقه په دوه طرفه ډول د مسافرو او تجارت پر مخ د پخوا په شان پرانیستل شوه. مسافر کولی شي د پاسپورټ، تذکري او شناخت کارټ له مخې پر دي لارې تګ راتګ وکړي چي دا به د افغانستان او پاکستان ترمنځ په تجارتي او ډيپلوماتيکو اړیکو او د سيمي پر تجارت مثبت اغيز وکړي."
پر ياده لار هره ورځ تر ۲۰زره تنو پوري افغان او پاکستاني اتباع د دواړو هيوادونو تر منځ تګ راتګ کوي.
دغه راز د افغاني سوداګرو په تازه ميوو بار لارۍ هم پرون جمعه له سپین بولدک څخه چمن ته رسېدلي دي.
دافغانستان او پاکستان ترمنځ د چمن - سپين بولدک لار د سيمي په کچه يوه د مهمو ترانزیټي او تجارتي لارو څخه ده چي د تېرو څلورو مياشتو راهيسي د کرونا په بهانه د مسافرو او تجارت پر مخ پاکستاني لوري تړلي وه.
له دې کبله د دواړو هیوادونو ترمنځ د مسافرو تګ راتګ او تجارت د ستونزو او مشکلاتو سره مخامخ وو.
د تيرو دوو مياشتو په جريان کي د ډيورنډ کرښي په دواړو غاړو کي مېشتو پښتنو قبايلو د دروازې د بيا پرانيستلو په موخه په چمن او سپين بولدک کي مظاهرې وکړې او يوه مياشت يي په چمن ښار ګوټي کې دپرلت خيمي ووهلي او د دروازې د خلاصون غوښتنه يي کوله.
درې اونۍ مخکې د لوی اختر په شپه مظاهرې په تاوتریخوالي واوښتي چي په ترڅ کې يې افغاني لوري ته د پاکستاني نظاميانو په بريدونو کې ۱۶ ملکي وګړي ووژل شوه او ۸۵ نور ټپيان شوه.
يادې پېښي د پاکستان او افغانستان ترمنځ پر تجارتي او ډيپلوماتيکو اړيکو هم منفي اغيز کړی وو.
