د لاس رسي وړ اتصالات

د پېښور د ښوونځي د برید د تحقیقاتو لپاره کمیسیون وټاکل شو


د پاکستان د سترې محکمې قاضي القضا د چارشنبې په ورځ امر وکړ چې د پېښور د پوځي ښوونځي د ٢٠١۴ کال د حملې تحقیقاتو لپاره دې یو عدلي کمیسیون وټاکل شي.

د پاکستان قاضي القضا ثاقب نثار د پیښور د عالي محکمې قاضي ته امر کړیدی چې عدلي کمیسیون دې وټاکي او تحقیقاتي رپورټ دې ورته وړاندي کړي.

د پېښور په پوځي ښوونځي په ٢٠١۴ کال کې یو بیسارې خونړی برید وشو چې پکې د ١٣١ ماشومانو په شمول ١٥٥ تنه ووژل شول.

د دغو وژل شوو ځینو ماشومانو مور پلار د څلورو کلونو راهیسې د حکومت نه غوښتل چې د پیښې د تحقیقاتو لپاره دې عدلي کمیسیون وټاکل شي خو د پاکستان پوځ ویل چې حمله کونکي یې نیولي دي او سزاگانې یې ورته هم ورکړیدي.

په دغه برید کې د وژل شوو ١٧ کلن اسفند خام مور شاهانه بي بي امریکا غږ ته وویل چې د عدلي کمیسیون غوښتنه ځکه کوي چې د ډیرو سوالونو ته تر اوسه ځواب ندی ورکړل شوی. هغې زیاته کړه د حکومت د تحقیقاتو نه بالکل هم مطمینه نه دي.

په پیښور کې د پوځي ښوونځي یا APS د پېښې په هکله د عدلي کمیسیون جوړولو غوښتنه د دغه سیمې د حقوقو فعالینو هم کوله.

د بشري حقونو فعاله شاهده شاه چې د خویندو موسسې غړې ده، د APS د پیښې د تحقیقاتو د غوښتنې لپاره د تیرو څلور کلونو نه فعالیتونه کوي. هغې امریکاغږ ته وویل، "مونږ د عدلي کمیسیون د جوړیدو لپاره مظاهرې کړي، غونډې یو کړي، پارلیمان ته تللي یو، عالي محکمې ته تللي یو. اوس مونږ هیله لرو چې د دغه پیښې تحقیقات وشي او په سمه توگه وشي"

اغلي شاه د کمیسیون په جوړیدو خوښي څرگنده کړه او وې ویل چې پکار ده اوس نتیجه هم معلومه شي.

  • 16x9 Image

    نزرانه یوسفزۍ

    نزرانه غفار  د ۲۰۱۱ کال راهیسي په واشنګټن کې د امریکاغږ سره د ژورنالستې او نطاقې په حیث کار کوي. نزرانه یوسفزۍ د انګلستان د مانچسټر د پوهنتون نه د بشري حقونو او نړیوال قانون په برخې کې خپله ماستري اخیستې ده.

    @NazranaYusufzai
    https://twitter.com/NazranaYusufzai

XS
SM
MD
LG