په بادغیس ولایت کې د وسله والو طالبانو په حمله کې د ملي اردو ۱۲ سرتېري وژل شوي دي.
د باغیس والي عبدالغفور ملکزي د جمعې په ورځ د «غوايي پر ۲۰مه» امریکا غږ ته وویل، چې د ملي اردو یادو سرتېرو تېره شپه د بالامرغاب ولسوالۍ په «اکازو» سیمه کې یوې امنیتي پوستې ته اکمالات کول چې د طالبانو له برید سره مخ شول.
ښاغلي ملکزي زیاته کړه چې د لومړنیو معلوماتو لهمخې په دغه نښته کې د ملي اردو ۱۲ سرتېري وژل شوي او یو شمېر نور ټپیان شوي دي.
هغه وویل، چې سیمې ته د کمکي سرتېرو په رسېدو طالبان د نښتې له ځایه تښتېدلي دي او سیمه دا مهال د افغان سرتېرو تر کنټرول لاندې ده.
طالبانو د دغه برید د مسؤلیت په منلو سره ویلي چې په دغه نښته کې ۲۰ کومانډويي سرتېري وژلي او ګڼ شمېر پوځي وسایل یې هم وړي دي.
د باغیس په بالامرغاب ولسوالۍ کې طالبان پر داسې مهال دغه برید کوي چې د افغانستان دفاع وزارت د روانې میاشتې پر ۷ مه نېټه له دغې ولسوالۍ څخه په بشپړه توګه د طالبانو ایستلو خبر ورکړ.
بالامرغاب تېره میاشت د افغان سرتېرو او طالبانو د سختو نښتو شاهده وه.
د بادغیس په ګاونډي د غور ولایت په ساغر ولسوالۍ کې هم د طالبانو په حمله کې درې تنه سیمه ییز پاڅونوال وژل شوي، څلور نور ټپیان شوي او دوه طالبانو نیولي دي.
د غور د والي ویاند وايي، چې دغه سیمې ته د تازه دمه ځواکونو په رسېدو سره طالبان له سیمې تښتېدلي دي.
د افغانستان په جنوب لوېدیځ کې په فراه ولایت کې هم د طالبانو په برید کې دری ملي پولیس وژل شوي او دوه نور ټپیان شوي دي.
د فراه د ولایتي شورا غړی دادالله قانع وايي، چې دغه پېښه تېره شپه د فراه ښار په ریګي سیمه کې رامنځته شوې ده.
طالبانو د غور او فراه د پېښو مسؤلیت هم منلی دی.
