د طالبانو حکومت تر ادارې لاندې د ترانسپورت او هوايي چلند وزارت وايي چې د خوست له نړیوال هوايي ډګر څخه متحده عربي اماراتو ته پروازونه پیل شوي دي.
د طالبانو د ترانسپورت او هوايي چلند وزارت د یکشنبې په ورځ جون دویمه (غبرګولي ۱۳) په ایکس پاڼه کې د اعلامیې په خپرولو د دغو پروازونو د پیلیدو خبر ورکړی دی.
دغه وزارت لیکلي: "نن یکشنبه د کام ایر هوايي شرکت د خوست له نړیوال هوايي ډګر څخه دوبۍ ته خپل دوه طرفه پروازونه پیل کړل.“
د کام ایر هوايي شرکت له دې وړاندې ویلي و چې له افغانستان څخه دوبۍ ته خپل پروازونه شمیر زیاتوي.
دغه شرکت له کابل او کندهار څخه دوبۍ ته په اونۍ کې اوه پروازونه درلودل او د خوست له هوايي ډاګر څخه د پروازونو په پیلیدو سره اوس له افغانستان څخه دوبۍ ته په اونۍ کې ۹ پروازونه کېږي.
د ترانسپورت او هوايي چلند وزارت د معلوماتو په اساس د کام ایر هوايي شرکت به په اونۍ کې دوه ځل د یکشنبې او پنجشنبې په ورځو له کابل څخه خوست ته او له خوست څخه دبۍ ته پروازونه وکړي.
یاد وزارت ویلي چې د دغو پروازونو په پیلیدو سره عربي هیوادونو ته د سفر په برخه کې مسافرینو ته زیاتې اسانتیاوې برابرېږي.
فورم \ دبحث خونه