د نړۍ د اوو سترو اقتصاد لرونکو هیوادونو (جي-۷) د بهرنیو چارو وزیرانو د اپریل په ۱۷ (وري ۲۸) د افغانستان او مرکزي اسیا تر عنوان لاندې غونډه کې د افغانانو په ځانګړې توګه د ښځو او نجونو په بشري حقونو او بنسټیزو ازادیو باندې د طالبانو له مخ په زیاتېدونکو محدودیتونو سره سخت مخالفت څرګند کړ.
د جاپان د بهرنیو چارو وزارت د یوې اعلامیې په خپرولو سره ویلي چې په دې غونډه کې د جاپان د بهرنیو چارو وزیر هایاشي یوشیماسا په افغانستان کې د بشري حقونو د خرابوالي او بشري وضعیت په اړه خپله جدي اندېښنه څرګنده کړه.
یوشیماسا، چې د غونډې کوربه و، په افغانستان کې په بشري حقونو په ځانګړي ډول د ښځو پر حقونو باندې د طالبانو محدودیتونه او د هغوی وروستۍ پرېکړې په "کلکه وغندلې".
جاپان یو له هغو هېوادونو څخه دی چې له افغانستان سره مرسته کوي.
د جاپان د بهرنیو چارو وزیر په دې غونډه کې له طالبانو سره په "دوامداره او مستقیم" تعامل او د نړیوالې ټولنې په همکارۍ د افغانستان خلکو ته د بشري مرستو پر دوام ټینګار وکړ.
د جاپان د بهرنیو چارو وزارت د اعلامیې له مخې، د جي-۷ ډلې د بهرنیو چارو وزیرانو وویل چې طالبانو ته باید یو واحد پیغام واستوي چې افغانستان د ترهګرو په خوندي ځاله بدل نه شي.
دوی وویل، طالبان باید بشردوستانه کارکونکي بې له کوم خنډه پرېږدي چې په اړمنو کسانو مرستې وویشي.
څه موده وړاندې طالبانو د ملګرو ملتونو په دفترونو او تر هغه دمخه په نورو کورنیو او بهرنیو غیردولتي ادارو کې د ښځو پر کار کولو بندیز ولګاوه؛ هغه پریکړه چې سخت نړیوال غبرګونونه یې راوپارول.
د نړیوالو له سختو نیوکو او په افغانستان کې د ځینو بشري سازمانونو د فعالیتونو له کموالي او ځنډېدو سره سره، طالبانو ویلي چې دا پرېکړه د افغانستان داخلي مسئله ده.
د طالبانو ویاند ذبیح الله مجاهد د اپریل په ۱۲ (وري ۲۳) په یوه اعلامیه کې وویل: «باید ووایو چې اسلامي امارت نه غواړي د ملګرو ملتونو پر وړاندې خنډونه جوړ کړي، بلکې غواړي دا مسله روښانه کړي چې دا موضوع د افغانستان داخلي ارزښت دی، د بل هیچا لپاره ستونزه نه رامنځته کوي، او ټولې خواوې باید ورته درناوی وکړي."
د مجاهد په وینا، د ملګرو ملتونو په دفترونو کې د ښځو د کار منع کول "تبعیض" نه دی.
طالبانو له دې مخکې د منځنیو او عالي ښوونځیو او پوهنتونونو دروازې د نجونو او ښځو پر مخ وتړلې او عامه ځایونو لکه تفریحي پارکونو، عامه حمامونو او کلبونو ته یې ښخې له ورتګ څخه منع کړي دي.