د سره صلیب نړیواله کمیټه وایي چې وروسته له هغې د غزني په ولایت کې خپل ټول فعالیتونه وځنډول چې یوې سیمه ایزې وسله والې ډلې په دې ولایت کې ددې کمیټې پنځه افغان کارکوونکي ونیول.
په کابل کې د سره صلیب د نړیوالې کمیټې ویاند احمد رامین ایاز امریکا غږ ته وویل چې د دې کمیټې دغو پینځو سیمه ایزو کارکوونکو په بامیانو او د غزني په ولایت کې له دوی سره کار کاوه.
ښاغلي ایاز وویل "دا پیښه د سه شنبې په ورځ د فبرورۍ په شپاړسمه پیښه شوې او تیره ورځ د سره صلیب له خوا زمونږ له دغو همکارانو سره اړیکه ونیول شوه، کوم وروستي معلومات چې لرو هغوی ښه دي ".
د سره صلیب د نړیوالې کمیټې ویاند د دغې وسله والې ډلې نوم وانخیست چې د آی سي آر سي د کمیتې دا پینځه کارکوونکي یې بندیان کړي دي.
هغه وویل چې ددغو نیول شویو افغان کارکوونکو د خلاصون لپاره د سره صلیب نړیوالې کمیټې په بیلابیلو کچو اړیکې نیولې دي.
ښاغلي احمد رامین ایاز وویل چې د دغو نیول شوو کسانو کورنیو ته هم خبر ورکړل شوی دی او د هغوی راخوشې کول د سره صلیب د کمیټې په لومړیتوبونو کې ځای لري.
ښاغلي ایاز وویل "اوس په غزني کې زمونږ فعالیتونه ځنډول شوي دي، خو په نورو ولایتونو کې زمونږ کار په عادي بڼه روان دی".
د سره صلیب نړیواله کميته له تیرو څه باندې درې نیمو لسیزو راهیسې د افغانستان په دننه او د دغه هیواد بهر په پاکستان کې د افغانانو سره په بیلابیلو برخو کې کارکوي چې د ښکیلو خواوو له خوا د بندي افغانانو کورنیو ته د لیکونو تبادله او هم د جګړې په لومړیو لیکو کې د ښکیلو خواو ترمنځ په نښتو کې د وژل شوو کسانو مړي د هغوی خپلوانو ته سپارل هم شامل دي.
په غزني کې د امنیتي ادارو چارواکو د سره صلیب د دغو پینځه نیول شوو کارکوونکو بندي کیدلو په باب بې خبري ښودلې ده.
د غزني امینه قوماندان جنرال امین الله امرخیل امریکا غږ ته وویل چې تراوسه یې د خپلو امنیتي ارګانونو څخه د دغې پیښې تائید نه دی ترلاسه کړی.
تراوسه کومې وسله والې ډلې د سره صلیب د نړیوالې کمیټې د دغو کارکوونکو د نیولو مسولیت په غاړه نه دی اخیستی.