د هند او نایجریا مشرانو د یکشنبې په ورځ نومبر ۱۷ (لړم۲۷) د بحري امنیت او د ترهګرۍ سره د مبارزې په برخو کې د اړیکو د قوي کولو ژمنې وکړې.
نایجریا ته په خپل سفر کې د هند صدراعظم نریندرا مودي د کوربه هېواد له ولسمشر بولا تنیبو سره په مرکز ابوجا کې ولیدل.
دوی دواړو همدغه راز د نړیوال جنوب (ګلوبل ساوت) ملتونو سره د همکاریو د ډېرېدو تعهد هم وکړ. ګلوبل ساوت، مخ په ودې هېوادنه بلل کېږي چې نایجریا، چین او د فارس خلیج ځینې شتمن هېوادونه هم په کې شامل دي. مودي ډېر کله هند د نړیوال جنوب غږ بولي.
نریندرا مودي وویل: «موږ به په ګډه په نړیواله کچه د نړیوال جنوب لومړیتوبونه په ګوته کوو او زموږ د ګډو هڅو څخه مننه. په دې برخې کې به هم بریا ترلاسه کوو.»
د دواړو په ګډې اعلامیې کې ژمنه شوې چې نوی ډهلی او ابوجا به د هند په سمندر او د ګینې په خلیج کې د مخ په زیاتېدونکي ګواښ سره د مبارزې لپاره د ترهګرۍ ضد، سمندري امنیت او استخباراتو د شریکولو په برخو کې همکاري زیاتوي.
د نایجریا ولسمشر د هند صدراعظم ته د نایجریا د نظم د لویې قوماندې مډال ډالۍ کړ. دا د نایجریا دویم لوی ویاړ بلل کېږي.
ولسمشر بولا تنیبو «نریندرا مودي د دیموکراتیکو اصولو او ارزښتونو د ډېر قوي تعهد» استازی وباله.
هغه زیاته کړه: «نایجریا له هند سره خپل عالي روابطو ته ارزښت ورکوي او د دواړو ملګرو هېوادونو د مشترکو ګډو د زیاتولو لپاره به کار وکړو.»
نایجریا په افریقا کې د هند تر ټولو ستر تجارتي ملګری بلل کېږي او په ۲۰۲۲ کال کې د دواړو هېوادونو ترمنځ تجارتي راکړه ورکړه ۱۴.۹ میلیارد ډالر اټکل شوې وه.
چارواکي وايي په نایجریا دا مهال کې ۶۰۰۰۰ هندي اتباع او شاوخوا ۲۰۰ هندي کمپنۍ شته.
فورم \ دبحث خونه