د لاس رسي وړ اتصالات

ایران د پوځي رسم گذشت د برید ملامتي د امریکا په سیمه ییزو ملگرو واچوله


ولسمشر روحاني وایي حتی کوچنیو ګواښونو ته به هم غاښ ماتوونکی ځواب ورکړي
ولسمشر روحاني وایي حتی کوچنیو ګواښونو ته به هم غاښ ماتوونکی ځواب ورکړي

د امریکا د بهرنیو چارو وزارت ویاندې هدر ناویرت وویل چې متحده ایالات ټول تروریستي اعمال او د هر بېګناه وګړي وژل غندي.

میرمن ناویرت زیاته کړه "موږ د ترورېزم د حملو په وړاندې د ایران له خلکو سره ملګري یو او په دې بد وخت کې خواخوږي ورسره څرګندوو."

د ملګرو ملتونو سرمنشي انتونیو ګوتیرش هم په یو بیان کې ویلي چې دا حمله غندي.

ښاغلي ګوتیرش د پېښې د قربانیانو له کورنیو، د ایران له حکومت او خلکو سره خواخوږي څرګنده کړې او د ټپیانو د سمدستي روغتیا هیله یې کړې ده.

د ایران مذهبي مشر د دې حملې پړه د هغه په وینا د امریکا پر "ګوډاګیانو" اچولې ده.

آیت الله علي خامنه يي پر خپله رسمي ویبپاڼه په یو بیان کې ویلي دا برید په سیمه کې د امریکا د "ګوډاګیو دولتونو" د پلانونو دوام دی چې هدف یې په ایران کې ناامني ده.

د ایران جمهور رئیس حسن روحاني د یکشنبې په ورځ (سپتمبر ٢٣) وویل د اهواز په برید کې چې ٢٥ تنه ووژل شول د هغو عربي الاصله مخالفو ډلو لاس دی چې امریکا او د عربي خلیج هیوادونه ورسره پوځي او مالي مرسته کوي. ښاغلي روحاني وویل چې پر ایران برید کوونکو ته به سخت ځواب ورکړي.

ولسمشر روحاني دا څرگندونې د سپتمیر په ٢٣ په تهران کې هغه مهال وکړې چې د ملگرو ملتونو عمومي غونډې کې د گډون لپاره نیویارک ته روانیدو.

د امریکا ولسمشر ډونالډ ټرمپ به د سپتمبر په پای کې د ایران په اړه د ملگرو ملتونو د امنیت د شورا د غونډې مشرې وکړي. ملگرو ملتونو ته د امریکا سفیرې نیکې هیلي د سه شنبې په ورځ وویل چې د ایران په اړه دغه غونډه به په نیویارک کې وشي.

اغلې هیلي زیاته کړه ولسمشر ټرمپ په دې باور دی چې امریکا باید ډاډه شي چې ایران د نورو هیوادونو په څیر نړیوال مقررات مراعاتوي.

د ایران په اهواز کې په پوځي پریډ د برید مسولیت چې پکې لږ تر لږ ٧٠ تنه ټپیان شول دوو ډلو منلی ده؛ داعش او د اهواز د ملي مقاومت په نوم د حکومت یوې مخالفې عربي ډلې.

پوځي رسم گذشت د ایران او عراق د جګړې د پېل د کلیزې په مناسبت ترسره کېده. د ایران او عراق جګړه په ۱۹۸۰مېلادي کال کې پېل شوه او په ۱۹۸۸مېلادي کال پای ته ورسېده.

د ایران حکومت په تهران کې د متحده عرب اماراتو، برتانیا، هالنډ او ډنمارک استازي د بهرنیو چارو وزارت ته احضار کړي او پر دې هېوادونو یې تور لګولی چې د ایران د اپوزیسیون ډلو ته یې پناه ورکړې ده.

د مجاهدین خلق په ګډون د ایران د حکومت ځینې مخالفې ډلې د ١٩٧٩ مېلادي کال، د اسلامي انقلاب له بریا وروسته په یو شمیر لوېدیځو هېوادونو کې فعالې دي.

XS
SM
MD
LG