د ایران قضایه قوه وايي دوه کسان یې قران او د اسلام پیغمبر ته د سپکاوي کولو په جرم په دار ځړولي دي.
د ایران د قضایه قوې پورې اړوند د میزان ویب سایټ د دوشنبې په ورځ مۍ اتمه (غوايي ۱۸) راپور ورکړ، چې صدرالله فضلي زیري او یوسف مهرداد چې د محکمې له خوا "د اسلام پیغمبر ته په سپکاوي او... قران کریم په سوځولو" محکوم شوي وو، د دوشنبې په سهار په دار وځړول شول.
میزان ویب سایټ لیکلي چې له دې دوو کسانو څخه یې یو تن د ۲۰۲۱ په مارچ کې په ټولنیزو رسنیو کې په خپلو لیکنو کې مقدساتو ته په سپکاوي کولو اعتراف کړی و.
له ایران څخه دباندې د بشري حقونو د ملاتړ ډلو ویلي چې په ایران کې دا ډول اعترافونه تر فشار لاندې او په "جبري" ډول اخیستل کیږي او دا کار یې غندلی دی.
د بخښنې نړیوال سازمان او د بشري حقونو د ملاتړ نورو ادارو د معلوماتو له مخې، ایران له چین وروسته په نړۍ کې تر ټولو زیات خلک اعداموي.
د بشري حقونو د ملاتړ دوو ادارو تېره میاشت وویل چې په ایران کې د یو کال وړاندې په پرتله په ۲۰۲۲ کې ۷۵ سلنه زیات خلک اعدام شوي دي.
ناروې میشتې د ایران د بشري حقونو ډلې او په فرانسه کې د اعدام سزا مخالف بنسټ په ګډ راپور کې ویلي چې په تېر یو کال کې، په ایران کې ۵۸۲ کسان اعدام شوي چې دا په ایران کې د ۲۰۱۵ راهیسې د اعدامونو تر ټولو زیات شمېر ښيي. د بشري حقونو د ملاتړ دغو دوو ادارو همدارنګه ویلي چې په په ۲۰۲۱ کال کې په ایران کې ۳۳۳ کسان په دار ځړول شوي دي.
